Mike de Meza, Parlamentario di partido AVP a expresa cu Mininister President Nelson Oduber ta duna oido na e consehonan di AVP ya cu gobierno actual no tin un maneho di eneregia y ya nan no por warda mas riba companianan di utilidad pa stipula un maneho. Gobierno a bin realiza cu mester duna atencion na e problema mundial di energia cu ta afectando e pueblo di Aruba tambe. No por tuma e problema aki leve ya cu e problema di energia lo no ta di un caracter cortico y sigur no ta asina cu e problema aki ta uno simplistico.

Mundialmente tur pais ta uni forza tur dia mas y mas pa ta mihor prepara pa enfrenta of purba di contraresta e crisis cu por perhudica un continuo suministro di fuente pa genera energia riba un costo cu mas control cu ta posibel. Un variedad di discusion ta necesario y mester inclui tur persona, gremio y gobierno. Aki de Meza a duna algun ehempel cu ta necesario pa por crea un base pa discusion. Por ehempel ta enfoca riba reparticion di ganashi dor di duna rebaho den prijs di awa y coriente; haci un “Detailed Operational Audit” den companianan di utilidad; construccion di proyectonan grandi, interesante y inovativo pa hasi uso di “Deep Sea Cooling”; programa di energia caminda ta hasi uso di fuentenan di energia por ehempel: Solo, Biento, Awa di lama y otro fuentenan alternativo pa combustibelnan.

“Den e ultimo reunion di diahuebs den Parlamento pueblo di Aruba por a bin nota cu Prome Ministro sr. Nel Oduber awor si ta totalmente di acuerdo cu e gran candidad di alternativa di fraccion di AVP pa yuda cu solucionan a corto plazo, mediano y largo plazo cu nos a presenta ya dos aña pasa”, Parlamentario di AVP ta expresa.

Igualmente e ta pidi Promer Minister pa splica ta dicon a warda te awor pa bin realiza cu e sistema convencional lo no ta pagabel sin mas den futuro cercano. Pueblo tin derecho di exigi di esnan cu ta goberna nos pais y ta e ehecutivonan cu ta dirigi e companianan di gobierno pa ta diligente pa prepara e companianan pa enfrenta cualkier situacion na un manera adecuado. No por tuma e postura arogante y conformista cu locual pasa tog ta pueblo tin cu paga ya cu ta un sistema di monopolio tin! E ta inaceptable ora mira cu no ta importante kende por cumpli cu nan deber si of no y si no ta paga ta corta meternan. Ningun hende tin mag di bagataliza e situacion socio/economico dificil na Aruba. Ta como sifuera cu hopi enberdad no sa ta kico ta e situacion doloroso cu ta biba den comunidad.

Partido AVP ta contento cu porfin Prome Ministro sr. Nel Oduber a bin para banda di partido di AVP y cu e kier cuminsa preocupa su mes pa e grupo financiero menos afortuna.

Awe partido AVP su precupacion ta: si gobierno actual lo sa di hasi bon uso di un proceso transparente pa hasi e cambionan necesario den companianan di utilidad y no pa bai hasi politica. Macaco ta hunga, huña y humiya su yiu y na fin di dia macaco ta saca wowo di su yiu tambe! Haci cambionan descabeya den e companianan no lo contribui na nada bon pa ni nos pueblo ni e companianan estatal y lo no wordo acepta.

“Ta pa e motibo aki cu nos fraccion di AVP a urgi gobierno pa tuma e siete mocionnan, di AVP cu unanimamente a wordo aproba den Parlamento, y haci bon uso di nan pa contraresta e crisis petrolero y trese alivio den e costo di awa y electricidad. Locual si ta precupa nos ta cu te dia di awe gobierno actual no por a presenta un maneho riba energia, sinembargo e precupacion pa cu e crisis mundial di energia ta uno hopi serio y cu mester su debido atencion”, de Meza a duna di conoce.