Keto bai e prijsnan riba mercado mundial ta causa situacionan intolerabel pa costo di energia. Sigur durante e ultimo siete añanan e costo di awa y electricidad a aumenta na un nivel alarmante. Aruba ainda ta leu for di ta prepara pa enfrenta e crisis mundial di energia. Ta conoci cu ya pa basta tempo pronosticonan cientifico riba mercado internacional ta alertando mundo di e crisis di energia cu ta wordo confronta awe, Parlamentario di AVP, Mike de Meza ta comenta. Ya ta dos aña pasa cu fraccion di AVP fuertemente a presenta diferente precupacionnan, ponencianan y solucionnan pa enfrenta y contraresta e crisis creciente riba mercado mundial di petroleo. E situacion ta uno alarmante y cu posibel efectonan desastroso pa e grado di bida socio/economico conoci na mundo. Un estudio intensivo y hopi detaya riba e problematica mundial den costo di energia a wordo hasi pa un comision di partido. Aki tambe a studia e sostenibilidad pa un energia disponibel y utilizabel. E estudio aki a wordo ehecuta den acuerdo cu e filosofia di Plan Aruba, pa por wordo usa pa den gobernacion.

“Awor Prome Minister sr. Nel Oduber, despues cu dos aña pasa a cherche y a duda den nos trabaonan serio y profesional, a bin ta para completamente banda di partido AVP pa cu e precupacionnan, ponencianan y solucionnan pa e problema mundial di energia”, de Meza ta duna di conoce.

Henter pueblo ta corda cu dos aña pasa ora cu fraccion di AVP a entrega diferente mocionnan, entre otro:

Awe Prome Minister Nel Oduber y e fraccion total di MEP ta completamente di acuerdo cu e precupacionnan, ponencianan y solucionnan presenta pa fraccion di AVP riba e crisis mundial di petroleo y energia cu ta afectando Aruba tambe. Tur locual partido AVP a bin ta bisa y ilustra den e ultimo añanan, Prome Minister Oduber awor si ta di acuerdo cune. Den Parlamento por a scucha Prome Ministro ripiti palabranan di partido AVP y ta di acuerdo cu companianan di Gobierno no ta prepara pa enfrenta e crisis mundial. Pa añanan a inverti hopi miyones den maneranan convencional di produci energia. Awe Gobierno no por sigui puntra pueblo pa tin comprension cu e aumentonan drastico riba e costo di awa y coriente. Lastima cu a dura dos aña pa gobierno actual y fraccion di MEP realiza cu partido AVP ya ta prepara pa deal cu e crisis mundial y hasi lo necesario pa contraresta e aumento drastico di awe y coriente.

Tambe sr. Nel Oduber ta di acuerdo cu partido AVP y ta puntra ta dicon ta warda te ultimo momento pa bin realiza cu e sistema convencional lo no ta pagabel sin mas den futuro cercano. Pueblo tin derecho di exigi di esnan cu ta goberna nos pais y ta e ehecutivonan cu ta dirigi e companianan di Gobierno pa ta diligente pa prepara e companianan pa enfrenta cualkier situacion na un manera adecuado. No por tuma e postura arogante y conformista cu locual pasa tog ta pueblo tin cu paga ya cu ta un sistema di monopolio tin! E ta inaceptable ora mira cu no ta concerni kende por cumpli cu nan deber si of no y si no ta paga ta corta meternan. Ningun hende tin mag di bagatalisa e situacion socio/economico dificil na Aruba. Ta como sifuera cu hopi enbardad no sa ta kico ta e situacion doloroso cu ta biba den comunidad.

Partido AVP ta contento cu porfin Prome Ministro sr. Nel Oduber a bin para banda di partido AVP y cu Prome Ministro kier cuminsa precupa su mes pa e grupo financiero menos afortuna.