Parlamentario Tromp ta hanja cu envez di a mustra respet pa nos grandinan diabierna ultimo door di siquiera baha y tuma e manifiesto for esnan cu tawata representa e grupo di nos grandinan, cu no mucho sorpresa por a tuma nota di e declaracionnan di promer minister, sr. Nelson O. Oduber, declara publicamente cu e ta hanja cu e marcha pasivo cu nos grandinan a tene siman pasa, ta mas bien un issue politico orkestra pa partido AVP. A llama esnan cu a marcha pa un set di bonchincheros cu no tin nada di hasi y djies kier hasi politica barata!

Parlamentario Tromp ta hanja e expresionnan aki hopi denigrante mes den direccion di nos grandinan cu actualmente door di e maneho desastroso di e Gobierno actual, ta pasando situacionnan financiero malo. Tromp ta puntra promer minister si acaso ningun di nos cuidadanonan no mag di hasi uso di nan derechonan pa expresa nan malcontento y preocupacion pa cu e situacion actual!

Desde inicio di e periodo di Gobernashon di MEP na anja 2001, esnan cu mas a wordo perhudica ta nos grandinan, debi na tur e medidanan cu a keda imponi riba nos pueblo door di no sa con ta Goberna un pais responsabelmente! Poder di compra a bay mas cu 25% atras y mientrastanto dia pa dia productonan di primera nesecidad ta birando mas caro. Partido di MEP durante campanja 2001 a hiba un campanja hopi agresivo mes enganjando pueblo cu nan si lo bay duna nos grandinan locual cu nan merece. E parlamentario ta sigui bisa cu ainda ta fresco den memoria di nos pueblo e “papelucho” cu partido MEP a parti den tur skina di Aruba na unda ta stipula e 10 puntonan di emergencia for di e “programma di accion di MEP 2001-2005”.

Unda cu a enganja nos grandinan cu den 90 dia AZV lo hanja su contenido real, unda e patient ta central y tambe lo traha ariba e reduccion di e prima de AZV pa nos grandinan!!! Tambe a enfatisa cu e tarifa di awa, coriente y telefoon lo wordo reduci!! Esaki ta djies 2 punto cu parlamentario Tromp kier a trese padilante pa asina mustra con hendenan sin cuero di cara ta drenta bo hogar y enganjabo cu cara seco! Pueblo mester djies compara AZV en su totalidad y tambe awa, coriente y telefoon na anja 2001 y comparanan cu awe! Pueblo mes por tuma su conclusion con drasticamente esakinan a aumenta y hasta remedinan cu mayoria di nos grandinan tawata hasi uso di dje a wordo kita for di e lista di remedinan di AZV!! Esaki ta e cruel realidad cu nos pueblo y principalmente nos grandinan ta bibando aden actualmente door di a kere den e enganjonan cu a wordo priminti na anan.

Pa finalisa parlamentario Tromp kier a felecita nos grandinan cu a mustra corahe diabierna ultimo, pa asina duna un ehempel na e resto di nos pueblo cu no ta pasobra bo tin un Gobierno cu a y ta persigui esnan cu no ta di acuerdo of di opinion cu nan, bo no por sali afor para pa bo derechonan!