Durante rueda di prensa na Cas di Partido AVP, mr. Mike Eman a enfatisa e atencion cu mester duna pensionadonan di Aruba. E a refleha riba e manifestacion di pensionadonan y e aumento grandi di costo di bida.

“Un pensioen sigur pa un y tur”, ta e nomber di estudionan profundo cu e partido AVP a haci pa salvaguardia e fondo di pensioen. Den e rapport aki ta duna hopi atencion na introduccion di un pensioen complementario (aanvullend pensioen). Partido AVP ta kere den un sistema di pensioen cu mester sirbi e interes di un y tur, cu ta solido y cu lo perdura pa hopi aña. Eman ta splica cu e pensioen adicional lo ta hopi importante mirando cu 75% di nos trahadornan na e momentonan aki no tin un pensioen di trabao, unicamente nan ta haña AOV. Apesar cu AVP a presenta e rapport aki na 2004 den Parlamento y na Minister nada a worde haci di parti di gobierno. Pesey mr. Mike Eman a anuncia cu AVP lo presenta un ley di iniciativa pa bin cu un pensioen general.

Aspectonan resaltante den e rapport ta na promer lugar cu AVP ta insisti cu tanten cu no tin un areglo pa un pensioen banda di AOV no ta husto pa aumenta e edad di AOV. Pesey AVP no ta apoya e pensamente awor di gobierno pa aumenta esaki na 62 of 65

Tur trahador mester bai ricibi banda di e entrada di pensioen AOV, un pensioen complementario. Di e manera aki AVP kier duna contenido na un reparticion mas husto di entradanan di e progreso entre trahador y pensionadonan y kita presion for di e nececidad cu AOV ta e unico entrada cu un pensionadnan ta conta cune.

Partido AVP ademas ta di opinion cu e edad di pensioen di 60 ana, mester conta tambe pa politiconan. Ta existi pues hopi desigualdad den e areglonan di pensioen y e edadnan. Tin un di dos discrepancia, esta cu e diferente pensioennan ta worde acumula, manera cu ta e caso di ambtenaar y politiconan pensiona. Esaki ta ensera cu e categoria di trahadornan aki lo ta ricibiendo como pensionado mas di locual nan tabata haña tempo cu nan tabata trahador. Harmonisacion di e edad di pensioen na 60 aña pa tur hende, incluso pa e ministernan y parlamentarionan ta forma parti integral di e rapport di AVP. AVP ta scoge pa un modelo cu tres pilar, di acuerdo cu e modelo di Banco Mundial. E sistema di pilar aki ta un regulacion cu ta consisti di: (1) pensioen basico cu ta cubri for di recursonan colectivo (prome pilar=AOV); (2) pensioen complementario for di salario riba capital (di dos pilar=pensioen di compania of pensionado, carga dor di empleado y dunador di trabao); (3) expansion pa circumstancianan personal (di tres pilar= asegurado di bida). Gobierno ta keda hunto cu e partnernan social den SVB, responsabel pa e seguronan social AOV/AWW, pero e pensioen general mester bira un “raamwet” cu ta regula cu e pensioen adicional mester bini, pero cu no ta mara na monopolio di un compania of fondo na unda ta sera e pensioen.

Ley y reglamentacion riba tereno di pensiun semper ta un cuestion di rosea largo. Final al cabo ta bai pa e garantia y seguridad di e pueblo. Loke ta mas sensato ta pa no deshaci di cosnan existente cu ta foi balansa di una bes asina, pero pa laga esakinan pasa bai cu tempo dor di generacionnan.

Di e manera aki no solamente derechonan obteni ta keda salvaguardia, sino tambe cu mas bien por adkiri un plano social y politico pa un maneho necesario, pero impactante. Proposicionnan recien cu a sali di parti di Gobierno no a carga e balansa aki y a causa intrankilidad dor di esaki sin duna claridad pa solucion. Tambe ta di importancia pa pinta e contornonan di e sistema for di cual nos ta tratando di sali foi dje. Esey kier men cu pueblo no solamente sa cua direccion ta bai tuma, sino tambe ta haya claridad pa loke ta trata e metanan final. Den esaki tambe opinionnan di e Gobierno actual a faya.

AVP ta spera di ofrece e seguridad y garantia den su vision riba e tema di pensioen cu ta pidi pa tranguilidad, e lider di AVP, mr. Mike Eman ta bisa.