Durante e casi 7 anja di gobernación di Gabinete Oduber 3 y 4 Aruba a conose un sota di medidanan y tambe e famoso y doloroso BBO cu a causa un desastre financiero pa hopi hogarnan di menos recurso. Pa hopi tempo integrantenan di Gabinete Oduber 4 a difama contrincantenan politico usando argumentonan manera: Cos ta hopi malo, Situación di Aruba ta malo a causa di gobernacion anterior, tin hopi debe y esun mas conosi di partido MEP ta: Ban tuma medida. E berdad y realidad amargo di tur esaki ta cu hopi hende a wordo manipula y ganja pa asina saca probecho for di nan, usando e placa recauda di tur e diferente medida nan y e BBO pa asina nombra alrededor di 1500 ambtenaar politicamente cu e respectivo 1500 salarionan nobo.

Tambe e placa recauda di e medidanan a bai entre otro pa paga diferente abogadonan entre otro, Omo di Minister Swaen, ruman di Minister di Justicia, Rudy Croes. E suma pa pago di huurmento di edificio perteneciente gran parti na ruman di Minister di Justicia y esnan hopi serca di parlamentarionan y ministernan di MEP a wordo aumenta. Con nos por sa? Cada biaha cu Gabinete Oduber introdusi un medida nos por spera mas nombracion politico of spera mas aumento di huurmento di edificionan. Un ta liga cu e otro. Durante diferente gobernacionan di signatura di MEP e mesun storia ta ripiti: Tuma medida y nombramento politico na gran cantidad. Y na momento cu partido AVP tabata tuma gobernación over e tabata kita tur e medidanan implementa door di partido MEP. Pueblo di Aruba ya no ta sucumbi mas pa mentiranan politico cu e proposito pa hunga cu sentimentonan e inteligencia di simpatisante nan.

Si berdad Gabinete Oduber tabata tin pueblo di Aruba na pecho, e lo no a nombra 1500 hende extra políticamente den aparato gubernamental ni tampoco lo ta sigui beneficia rumanan di mandatarionan cu placa di huurmento di edificio cu consecuencia cu mester tuma medida pa paga e salarionan nobo aki y tambe e mobilario necesario pa e 1500 ambtenaar extra aki. Gabinete Oduber 4 ta parse di no tin consenshi ni duele ora ta malgasta y mal usa e placa recauda di e diferente medidanan cu e mesun Gabinete aki a implementa. Cu ki cara y argumentonan gobernantenan y parlamentarionan di Gabinete Oduber 4 lo bai bishita cas durante siguiente campanja?

Ki splicashon por duna e pensionadonan y esnan cu ta cobra salario minimo y onderstand na momento cu nan puntra: Pakiko boso no por a usa e placa recauda di BBO y otro medidanan pa drecha cuido medico y asina por haya e remedinan back cu a wordo kita for di nos? Pakiko boso no por a inverti e placa cu boso a kita for di nos pa aumenta e seguridad y bienestar di nos pais? Pakiko no por a inverti e placa aki pa enseyansa y drecha e schoolnan cu ta den un estado deplorabel? Pakiko boso a usa mi placa pa paga pa traha un brug di 600 mil florin pa un proyecto familiar di Minister Marisol Lopez Tromp? Pa ki motibo boso no a usa e placa cu boso a ranca for di nos pa asina hisa onderstand cu ne?