AVP - Noticia - BBO CAUSA PRIMORDIAL DI INFLACION FEROZ

AVP - CRISTIAN DEMOCRATA ARUBA

IMF awor ta confirma ponencia di AVP y Mike Eman

BBO CAUSA PRIMORDIAL DI INFLACION FEROZ

Devastador tambe pa clase medio y inversionista!

Home > Centro di Prensa > Noticia > 20080224

Lesa version na Hulandes

“Awe Aruba ta pagando e prijs pa BBO: Un inflacion di 10.2%. Esaki ta dobel di nos partner commercial mas grandi, esta Merca. Esey kiermen cu e causanan di e inflacion espantoso aki ta domestico. Tres letter: BBO.”, esaki ta e reaccion cu e lider di opsicion, mr. Mike Eman a duna relaciona cu e cifranan espantoso di inflacion pa final di 2007 cu CBS a publica na januari.

Minister di Finanzas, Nilo Swaen a sali afor bisa cu no ta BBO ta causa di e inflacion feroz aki. Awor “Executive Board of the International Monetary Fund (IMF)” ta conclui den su rapport di februari 2008 cu BBO ta causa primordial di e inflacion feroz na Aruba.

Den su rapport awor IMF ta confirma locual mr. Mike Eman a bisa:

“Inflation has accelerated owing to one-off supply shocks. After broadly following changes in the U.S. Consumer Price Index (CPI) for several years, inflation in Aruba almost tripled from 2.5 percent year-on-year in December 2006 to 7.3 percent in October 2007. The acceleration is largely due to the introduction of a turnover tax in January 2007, which is estimated to have contributed 3 percentage points to CPI inflation in 2007”.

End of Year & Year to Date Diff. CPI over 1997-2007

“E rapport di IMF a monateria te cu October di 2007. Mientrastanto nos sa cu inflacion a yega 10.2% na December. Kiermen e concecuencianan di BBO hasta ta resultando mas feroz ainda, e lider di AVP, mr. Mike Eman ta splica. E kier sa kico Minister Nilo Swaen ta bai bisa awor.

“Double digit inflation”, a causa na Sur America un pobresa enorme, a destrui e clase mediano y kibra confianza di inversionistanan”, esaki ta locual Gabinete Oduber ta causando pa Aruba, Eman ta remarca a base di analysisnan macro economico di kico tabata e efecto di inflacion grandi riba e pueblonan di paisnan den nos continente.

Mr. Mike Eman ta splica cu inflacion tin concecuencianan grave:

1	-	Perdida di poder di compra; esaki ta causa pobresa y deteoro den calidad di bida pa tur hende. Esnan cu ta na nivel di e canasta basico ta sufri, pasobra hustamente esaki ta esun cu mas ta subi. Esnan cu no tabata tin pa paga e canasta basico ta cai den un miseria total.

2	-	Aruba ta bira mucho caro. Posicion di competencia di Aruba ta worde perhudica. Esaki ta trece problema pa deficit riba Balansa di Pago, reduccion di divisas cu efectonan peligroso pa stabilidad monetario.

3	-	Aumento di prijs continuo y instabildad di prijs ta haci prijsnan menos predicibel y ta kita posibilidad pa consumidor por sigui criticamente e desaroyo di prijsnan den diferente establecimento comercial. Si consumidornan worde desanima pa busca e mihor prijs esaki ta kita incentivo tambe di e establecimentonan comercial pa competi cu prijsnan scerpi. E concecuencia ta cu prijsnan ta subi mas ainda.

4	-	E interes pa spaar tambe ta baha. Locual bo ta haya na interes ora di spaar ta worde comi dor di inflacion; mas hende ta biba di dia pa dia. Esnan cu ta spaar ta worde castiga cu perdida di e valor di su fondo. Por lo general tur ricibidor di entradanan fijo (spaardo, pensionado, huurdo di cas y propiedad cu ta mara nan contract) ta sufri perdida di poder adquisitivo di su ingreso.

5	-	Insiguridad y instabilidad macro economico ta kita interes pa inverti. Inversion ta keda unicamente den e poco area cu ta spera ganashi. Economia ta keda cu menos diversividad. Perdida y falta di empleo den mas area.

6	-	Interes riba fianza ta keda halto of ta subi. Banconan no por fia pa interes mas abao si inflacion ta come nan interes riba fianza; E aumento di riesgo lo provoca un aumento den e costo di placa (interes) pa cubri pa e perdida di poder di e placa y pa cubri pa e riesgo di no por incalcula den un mercado instabiel kico e perdida di poder cu inflacion lo ta. Esaki ta causa tambe menos inversion productivo dor di inversionistanan, mas poroblema financiero pa famianan cu mester fia placa na interes halto pa cas y consumo.

“BBO a causa e redoblacion di inflacion compara cu Merca, pasobra banda di tur e schakelnan di 3%, 6% y 9% cu e a agrega na productonan e a empeora e concecuencia di aumento di inflacion importa (dor di prijs di petrolio) cu e efecto multiplicador di 3%, 6% y 9% di BBO. Si no kita BBO cada vez cu tin un aumento den exterior e efecto multiplicador di BBO lo keda tin e efecto penoso aki, mr. Mike Eman ta splica. No ta cuestion so di trece prijsnan bek, pero di para e spiral di aumento aki cu lo sigui si no kita BBO. Fraccion di AVP a presenta den un forma cuantifica den e Presupuesto Alternativa ta con por hiba un maneho financiero responsabel cu ta habri caminda pa kita BBO, trece alivio pa pueblo y haci inversion necesario pa un calidad di bida debido pa comunidad, mr. Mike Eman ta enfatisa.

top