Dia pa dia e situacion global pa cu e crisis den energia ta bira mas bisto pa esnan cu no diariamente ta envolvi den e materia. Calculo y estimacion hasi dor di expertonan mundial ta indica cu aki 10 pa 15 aña e consumo mundial di azeta lo aumenta cu 45 prociento y e demanda pa electricidad y awa potabel lo aumenta cu 55 prociento. Awor si e produccion aumenta abase di datos for di añanan nobenta te presente, nos lo tin un deficit den candidad di azeta mas grandi cu nos por imagina nos mes, Mike de Meza, miembro di Parlamento pa fraccion di AVP ta expresa cu tono preocupante. Tin mas y mas evidente cu azeta lo yega su peak balance dentro di e siguiente 5 pa 15 aña y despues e posible produccion lo cuminsa baha significantemente ya cu mundo lo a usa mitar di total azeta di prijs baho cu mundo tin.

Despues di e peak aki mundo lo conoce e epoca di prijsnan haltisimo y for di tur proporcionnan a resultado di:

Na momento cu esaki tuma lugar e lo trece impactonan devastador riba economia mundial; esaki lo trece recesion mundial, tensionnan internacional lo aumenta cu gueranan potencial, deglobalisacion di economianan y imbalance grandi den awa y coriente. Lastima cu pronosticonan cu cientificamente ta wordo treci dilanti ainda no ta haya e audiencia necesario, de Meza ta comenta y ta agrega cu e mesun tipo di pronosticonan aki cu cientificamente a wordo anuncia den pasado a prueba nan mes y bira realidad casi identico cu nan pronostico.

Mike de Meza, parlamentario di partido AVP, elaborando riba situacion di petroleo cu ta afectando nos pais directa y indirectamente, a duna di conoce cu atrobe mundialmente prijsnan di crudo a aumenta, riba di US$ 100. Durante e ultimo siete aña prijs di crudo a aumenta cu mas o menos 400%. Na 2001 e prijs average di crudo tabata rond di US$ 25 pa bari, awe na 2008 esaki aumenta y ta riba di US$ 100 pa bari.

Tin hopi pronostico cu a wordo haci na diferente paisnan dor di ehecutivonan y instancianan reconoci na mundo riba e tereno petro-industria. Esakinan ta pronostica cu e prijs di crudo lo aumenta y por yega US$ 125 te cu US$ 150 pa bari den futuro sercano. Esaki lo causa un desastre economico na mundo en general y specificamente na paisnan cu no ta prepara y sigur na paisnan cu ta depende di importacion di productonan pa nan sobrevivencia.

Ta asina cu e gran cantidad di minananan di azeta cu a wordo explota for di principio ta e minananan menos complica. Awor cu e minanan complica mester wordo explota, como consecuencia di liquidacion, e proceso a bira mucho mas compleho y siguir mucho mas costoso. E otro causanan cu a contribui na e aumento di prijs di crudo ta entre otro: consumo enorme di productonan petrolero na China y India, cu ta e dos paisnan cu mas habitante na mundo. Tambe e tension cu tin na mundo entre algun pais.

E parlamentario di AVP ta expresa cu si analiza localmente e maneho di gobierno awe caminda costo di bida ta sigui aumenta, e efectonan pa Aruba lo bira desastroso. Esaki lo pone un peso asina grandi riba nos cu e lo manca e economia di Aruba. Na e momento aki gobierno di Aruba no tin un maneho riba economia ni riba asuntonan di energia, como tampoco un vision riba e problematica di energia mundialmente. Y peor ta cu gobierno y e companianan di utilidad ta keda inverti solamente den un direccion cu ta e sistema convencional di fuel oil.

Pesey na final Mike de Meza un biaha mas ta duna di conoce cu solamente si Aruba tin un vision alternativo bon argumenta, studia y documenta manera partido AVP a demonstra di tin nos lo por enfrenta e crisis mundial di energia!