Mike de Meza, Parlamentario di AVP ta considera remarcabel cu e parti pariba di nos isla ta wordo neglisha den un forma structural cu por pone cualkier persona kere cu e gobierno actual tin un boycot formal contra San Nicolas y vecindario. Con porta cu tin asina hopi facilidad deportivo pariba di nos isla cu ta den un estado asina deplorabel. Ora bo mira awe cuanto problema social tin den nos pais y con tiki durante e ultimo 7 añanan a wordo hasi dor e gobernantenan actual, ta cos di yora, de Meza ta comenta.

Hasta deporte, caminda tur hende sa cu deporte ta un gran aporte pa por tin lidernan pa mañan, a wordo totalmente neglisha dor di e gobernantenan actual pa cu e parti pariba di nos isla.

Ultimo añanan Aruba a conoce un aumento dramatico di hobennan cu ta cai den problematica di droga, alcohol, embarazo hubenil y actonan criminal, caminda ya un educacion sano pa hopi hoben no ta alternativa. Tur rond di mundo paisnan grandi y chiquito ta lucha pa contraresta e sintomanan di drogadiccion, criminalidad y embrazo hubenil cu mihor programanan di deporte y educacion, mihor hermentnan y mihor facilidadnan pa educacion y deporte. Na Aruba mas y mas ta como si fuera cu e gobernantenan no ta interesa of concerni cu e ultimo datonan demografico negativo creciente di nos hobennan.

Wak por ehempel con ta para cu Joe Laveist Sport park cu ta den un estado alarmante. Canchanan di basketball, voetbal y baseball den diferente barionan pariba di nos isla. Un situacion realmente inaceptabel pa pueblo. Tambe wak con hopi si no ta tur e clubnan di barionan a bai perdi. Aki ta caminda antes asina hopi cos bon pa e hobenan tabata wordo hasi. Mike de Meza ta expresa cu e criticanan pa cu gobierno di MEP no ta bin for di no where, ta hechonan cu tambe ta wordo confirma door di presidente di ASU, Aruba Sport Unie, Jerry Franca, kende den declaracionnan recien a haci e mesun comentario; esta cu gobierno durante 7 aña largo no a inverti den deporte na San Nicolas, cu San Nicolas tabata e parti di nos isla cu mas deportista tabata aporta y awendia no ta ni tende di deportistanan di e parti aki.

E maneho di deporte, educacion y social na Aruba mester di cambionan fundamental caminda tin bista riba termino cortico, medio-largo y largo plaso. Manehonan realistico cu tin e probabilidad mas halto pa duna un resultado cu ta benificia e pais den su totalidad y no un sistema pa benificio di gobernantenan.

Si mira cu den mundo di deporte casi semper tin hopi mas delegadonan (di gobierno y di clubnan) ta biaha cu tin deportistanan ta participa den encuentronan internacional, esaki ta simplemente un berguenza cu ningun hende por hustifica. Locual ta necesario na Aruba ta visionnan nobo mas dirigi riba e deportistanan y nan comunidad.

Finalizando Mike de Meza ta expresa cu e trato cu San Nicolas y vecindario ta haya ta inaceptabel. Gobierno tin cu percura pa e maneho integral y total di un pais completo.