Lesa version na Hulandes

Ademas di a aporta na biblioteca di e scolnan secundario na San Nicolas y Sta Cruz, ingeniero Mike de Meza a haci entrega tambe di buki di autor Yolanda Croes na nos grandinan di HUIZE MARISTELLA.

Na Huize Maristella, nos grandinan a keda agradabelmente sorprendi cu e donacion aki, ya cu nan tur ta corda e tragedia di Avia Air den cual nan Chana stima a fayece, cu autor Yolanda Croes a relata den su buki “Acompaña pa un Angel, e tragedia di buelo 2000”. Tambe nan ta corda e odisea di e conocido Buchi Panama den e buki ‘Perdi riba Lama’. Tambe a haci entrega di e buki “Unda bo ta mami?” y e directora a acepta e bukinan na nomber di e grandinan y a gradici Sr. Mike de Meza pa e bunita gesto y a laga sa cu nan activiteitenbegeleidster lo lesa e storianan pa e grandinan di Maristella.

Riba e potret por aprecia Mike de Meza y autor Yolanda Croes na momento cu ta entrega e bukinan na Zr. Agnes, directora di Maristella.