Parlamentario pa fraccion di AVP, sr. Alexander Tromp, ta hanja cu e maneho imponi pa minister Marisol Lopez-Tromp encuanto otorgamento di tereno pa construccion di cas propio ta hopi anti-social mes y ta perhudicando esnan di menos recurso!

Parlamentario Tromp ta sigui elabora cu ora un cuidadano bini ta remarka pa hanja un tereno, esaki sin mas ta mara na condicionnan hopi riguroso mes cu e cuidadano di menos recurso no por cumpli cune y consequentemente despues di cierto termino ta perde e tereno. Locual cu e parlamentario kiermeen cune ta cu un di e puntonan cu sigur cu ta perhudicabel pa esnan di menos recurso ta e punto na unda ta exigi di e cuidadano cu e mester prueba cu e ta dispone di suficiente placa of cu e por hanja financiamento via di un Banco of FCCA pa construi su cas. Mas cu claro un cuidadano cu ta gana un sueldo minimo of simplemente ta traha aki aja un side job, hamas y nunca por cumpli cu e requisito aki. Pero esey no significa cu hamas e lo por construi su propio cas.

Parlamentario Tromp ta splica con antes famianan ta bini hunto pa asina juda un miembro di familia pa locual ta encera construccion. Un luna por ejempel ta bini hunto pa basha fundeshi y asina despues e cas ta keda para por ta pa algun luna pa despues ora hanja forza financiero atrobe ta continua cu e construccion di e cas te ringbalk na unda asina por acuda na un banco pa hypotheek. Asina esnan di menos recurso por mira nan sonjo di tin nan propio cas bira un realidad. Pero cu e maneho anti-social di minister Lopez-Tromp esaki ya no ta posibel mas mirando e hecho cu e tereno lo wordo kita door di no por cumpli cu locual ta stipula den e reglanan.

Parlamentario Tromp ta splica cu e conoce un caso na unda un pareha cu 1 jui a perde e oportunidad di construi nan propio cas. E esposo ta traha den construccion y ta gana un sueldo minimo. Pero riba su mes ta traha algun side jobs tambe y fuera di esey su esposa ta jude tambe door di traha snacks y bende esakinan y asina nan ta lucha pa bay dilanti. Ora cu nan a hanja e grato noticia cu nan ta bini na remarka pa un tereno, cu tristesa despues di algun luna a hanja notificacion cu e tereno a wordo pasa pa otro persona caba door cu nan no por cumpli cu e beleid cu minister Lopez-Tromp a bini ta impone. Y siendo den e caso aki sigur sigur e pareha aki cu pasenshi y tempo lo por a realisa nan sonjo di tin nan propio cas.

Parlamentario Tromp durante e tratamiento di e presupuesto di minister Lopez-Tromp a hasi e remarka aki y un apelacion na minister pa evalua e beleid inhusto aki pa asina duna esnan di menos recurso un oportunidad toch pa asina yega na nan propio cas. Como contesta e minister a bisa cu esaki no por mirando cu si un cuidadano no por prueba cu e ta dispone di suficiente placa of cu e no por hanja un prueba di un Banco of FCCA, nunca e lo por construi un cas riba propio forza! Segun Parlamentario Tromp esaki no ta berdad mirando e hecho cu den pasado si tin cuidadanonan cu a construi nan cas y den algun anja a termina esaki tambe cu ayudo di familiaresnan y amistadesnan. Parlamentario Tromp ta hanja cu esnan di placa so tin oportunidad y prioridad serka e minister y Gobierno aki pa bay dilanti manera ta e ejempel di un caso na unda cu 1 solo comerciante a hanja mas di 7 tereno comercial otorga door di e minister aki y mientrastanto e familia humilde si mester mira e oportunidad di tin nan propio cas bay perdi door di no tin suficiente recurso pa bay un Banco of FCCA, e parlamentario ta termina!