Inflacion na Aruba over di januari 2008 a resulta 0.6 porciento. Esaki ta refleho di tendencianan inflatorio cu ta operando den nos economia. Expectativa di inflacion pa 2008 pa Aruba no ta pinta bon si considera aumentonan den prijs di productonan agricola y prijs di crudo ariba mercado internacional, un posibel loonspiraal a consequencia di scarsedad di trahador y di posibel indexering, y naturalmente uitwerkingen di BBO y otro medidanan pa carga gastonan publico di e gobierno actual.

Pregunta ta kiko Gabinete Oduber IV ta hasiendo pa mantene stabilidad di prijs na Aruba. Stabilidad di prijs ta aporta na mantene e poder di compra. E ta evita perdida grandi di poder di compra manera hopi di nos a conoce durante 2007. Ta e perdida di poder di compra ta e costo cu inflacion for di proporcion ta exigi.

Kisas ta bon pa ilustra e efecto di inflacion ariba cartera di ciudadanonan, pa demonstra e daño cu inflacion ta causa na e consumidor. Inflacion ta come e poder di compra, reduciendo e balor di florin cu bo tin den bo cartera. Un bon ehempel pa ilustra esaki ta e impacto di inflacion ariba e poder di compra di penshionado cu ta biba di AOV.

Perdida di poder di compra: ehempel di AOV

E adaptacion di e nivel di AOV entrante 2008 ta di 3.1 porciento, cual segun gobierno a ser causa pa BBO. E base pa compensacion di AOV pa 2008 ta e nivel di inflacion over di augustus 2006 pa augustus 2007, y esaki ta indica cu un compensacion di 5.7 porciento ta na su lugar. Na banda, mester tene cuenta cu e inflacion real over di 2007, cu tabata igual na 10.2 porciento. Den su totalidad ta duna bista di e siguiente tres scenarionan manera ilustra den e tabel.

Analysando e cifranan aki, por conclui cu entrante 2008, ariba e compensacion di 3.1 porciento di SVB, e pensionado a bai atras den poder di compra cu no menos cu 6.9 porciento. Esaki ta significa cu pa por a mantene su poder di compra na 2008, e pensionado soltero lo mester a ricibi un suma extra di Afl. 70,= pa luna, mientras cu e pareha lo mester a ricibi un suma extra di Afl. 118,= pa luna. Prijsnan general na Aruba pa 2007 a subi cu 10.2 porciento. Pa por a mantene e nivel di bida igual na esun den januari 2007, pensionadonan soltero respectivamente pareha lo mester a ricibi Afl. 1.091,= respectivamente Afl. 1.838,= na pensioen.

Pero e situacion actual ta cu e Fondo di SVB no por carga un aumento den pensioen asina drasitico, si kier mantene e mesun Fondo aki den un forma duradero cu ta economicamente responsabel. Entrante 2008 SVB a compensa solamente 3.1 porciento di e 5.7 porciento cu ta e base di compensacion. E realidad economico aki a costa pensionadonan 2.5 porciento di nan poder di compra segun e base di indice di augustus 2007 riba augustus 2006.

Maneho activo pa juda mantene stabilidad di prijs

E ehempel di perdida di poder di compra di pensionadonan sigur ta ilustra e costo di inflacion ariba ciudadanonan. Pero e ta ilustra tambe e dilema cu si kier compensa totalmente e perdida di compra cu lo tin otro gruponan cu lo mester paga pa esaki. Den e caso di pensionadonan lo ta e trahador y e donjo di trabou lo mester bai paga pa cualkier aumento. E situacion di pensionado ta demonstra claramente e importancia di un maneho activo pa juda mantene stabilidad di prijs na Aruba. Maneho bou di Gabinete Oduber III y IV a juist aporta na accelera inflacion na Aruba, cual a bai a costo di e poder di compra di e trahador y e pensionado. E tension reinante entre Gabinete Oduber IV y sindicatonan ta encuanto kende ta bai paga pa perdida di poder di compra cu Gabinete Oduber IIV y IV a juda ocaciona.

Indicacion ta cu e inflacion na 2008 na Aruba lo bolbe surpasa nivelnan usual pa un parti a consequencia di decionnan interno relata na mercado laboral. Esaki lo trece mas perdida den poder di compra. Bou di condicionnan semehante ta importante pa Gobierno hiba un maneho mas activo pa aporta na un mihor stabilidad di prijs, aportando activamente a reduccion di tensionnan reinante. Cu esaki ta evita cu cambionan den e nivel general di prijs na Aruba ta di mes un magnitud cu na 2007, evitando mas perdida den poder di compra, y evitando mas tension den nos sociedad.