Mirando e desaroyonan di e ultimo dianan aki, nos por a mira un pueblo rabia den su mayoria. Nos por a mira un pueblo decidido, un pueblo cu a pone tur miedo pa persecución politico un banda y un pueblo cu ya no ta sucumbi mas pa injusticia di parti di gobernantenan, parlamentarionan cu ta sostene gobierno, cu a lubida gran parti di e pueblo di Aruba. Desde 2001 pa 2008 nos por a observa con costo di bida a subi na un manera alarmante. Pueblo di Aruba a experimenta y ta experimentando momentonan sumamente difícil pa loke ta trata nan presupuesto familiar.

Un detereoro social grandi den nos comunidad. Mayornan hopi biaha ta haya nan ta traha 2 trabouw of mamanan soltero cu ta traha 2 trabouw pa por sobrevivi e costo di bida halto. E falta di atención na e yuinan cu no ta haya e calor y amor nesecerio pa motibo di mayoornan cu no tin e tempo pa hasi tal. Otro factor cu ta hunga un rol grandi ta e detereoro di salud pa motibo di e desgaste na un forma rapido di e curpa pa motibo di e trahamento di horanan largo y pa hopi dianan largo. Nos por tende di parti di Minister y tambe di AZV cu hendenan ta abusa di e fondo di AZV door di bay dokter regularmente, pero ta esaki nan ta algun di e factornan cu ta causa e cansancio y detereoro fisico.

E hende a bira mescos cu un robot, programa pa traha pa paga pa e medidanan cu cada biaha Gabinete oduber ta bin cune. E pobresa aki na Aruba a crese considerablemente y e por ser sinti cada dia den pueblo di Aruba. E detereoro social causa pa Gabinete Oduber 4 no ta wordo ni combati ni wordo frena door di e propio Minister Marisol Lopez Tromp, cu ta encarga cu e cartera di Asuntonan Social. Es mas e propio Minister aki ta contribui pa e abuso contra esnan di menos recurso den e pais aki sigui tuma lugar, door di duna ordo pa usa alrededor di 600 mil florin for di fondo di pueblo, pa traha un brug pa un proyecto di un restaurant familiar, cual placa por a ser dsstina pa un fondo di alimentación pa esnan cu ta acudi na school sin alimentación. Hopi di e casonan lamentable aki ta ser registra na diferente schoolnan di Aruba. No ta un secreto tampoco cuanto yui nan, pa falta di atención ta subi caya na un edad sumamente hoben y ta haya y aplica conseho cu mayoornan sigur lo no a duna nan hamas. Nos tur por lesa y observa den diferente matutinonan y fuentenan di noticia con criminalidad y violencia a aumenta na Aruba memei di e hobenan.

E pregunta ta: Minister Marisol Lopez Tromp tin atención pa e situación alarmante aki, of e atención ta ariba solamente e cartera di Infrastructura cu por contribui na fondonan pa un siguiente campanja electoral? Minister di Asuntonan General, Sr. Nelson Oduber, no ta ripara e detereoro social den nos comunidad? E BBO cu a caba di strangula e fondonan familiar ta parse di ta algo sumamente positivo pa Gabinete Oduber 4 cu kisas hasta lo por aumenta e BBO comulativo aki te na 6%. Un conclusión nos por saca sigur cu mientras Gabinete Oduber ta goberna e pueblo ta sigu y lo sigui wordo asota cu medidanan. Alrededor di 700 miyon florin a drenta caha di gobierno door di e diferente medidanan y BBO pero sin cu e pueblo por a gosa di un repartición husto. Partido AVP a traha un tegenbegroting, un presupuesto alternativo caminda ta pone fondonan disponibel pa puntonan di suma importancia manera: Ensenjansa y sigur Asuntonan Social.

Pa combati e detereoro social partido AVP ta aloca 8 miyion florin pa por combati e pobrese cresiente. Sumanan a wordo aloca pa hisa e bijstand cu 50% y tambe AVP ta introdusi un toeslag di 100 florin extra pa luna pa cada mucha cu ta bay school te na e edad di 18 anja.

Partido AVP ta prepara pa e reto grandi di rescata e pais aki, no cu promesanan di: NOS POR MAS, sino cu echonan.