Parlamentario Tromp pa fraccion di AVP ta hanja cu ta hopi lamentabel mes pa constata e actitud mediocre di Gobierno pa cu nos grandinan! Nos grandinan atrobe a tuma e curashi di enfrenta Gobierno pa cu nan derecho riba un aumento di nan entrada, specialmente mirando e hecho cu anan ta e grupo cu mas a wordo afecta door di tur e medidanan cu Gobierno a bini ta imponiendo durante e ultimo 7 anjanan.

Gobierno sin cuero di cara a laga sa cu no tin espacio y cu ta solamente esnan den dienst activo por bin na remarka pa cu locual cu Gobierno kier ofrece, esta e suma di 950 florin pa anja. Es decir cu hasta aki nos grandinan a hanja un bofta den nan cara pasobra ni pa cu e suma di 950 florin pa anja, na no ta bini na remarca pa cu esaki mirando cu ta esnan den dienst activo so Gobierno a ofrece e miseria aki! Mas cu claro e otro sindicatonan no a accepta e miseria cu Gobierna a ofrece na nan miembronan.

Parlamentario Tromp ta sigui bisa cu ainda ta fresco den memoria e declaracionnan di minister president algun simannan atras ora cu un grupo di nos grandinan a marcha pa entrega un manifiesto na Gobierno y tambe na Gobierno Hulandes, na unda cu e la declara cu esnan cu ta protestando mester ta contento cu locual nan tin actualmente y cu nan mester compara nan entrada di pension cu esnan cu ta biba na Corsow cu ta hopi menos cu esnan cu ta di Aruba. Parlamentario Tromp ta puntra minister presidente cu ki intencion e la declara tal insulto den direccion di nos grandinan? Aki nos ta bibando riba Aruba y no na Corsow!! Aki claramente pueblo por tuma nota di e mentalidad di e Gobierno cu no tin ni un minimo di respet pa nos grandinan y simplemente ta hasi mofa di nan. Parlamentario Tromp ta puntra minister presidente con e situacion lo tawata ta si na anja 1996 Gabinete EMAN II no a tuma e curashi pa redobla e pension di nos grandinan, na unda cu Nel Oduber e tempo ey a bisa cu esey hamas y nunca por!!

Asina mes cu e redoblacion nos grandinan actualmente ta bibando den un situacion financiero penoso door di e mal maneho descabeya di Gobierno den e ultimo 7 anjanan. Hopi ta nos grandinan cu mayoria di nan medicamento cu nan mester tuma tur dia a wordo geschrapt for di e lista positivo di AZV y consequentemente nan mes mester paga esaki. Pero manera cu ja e parlamentario a bisa caba cu cada bez cu nos grandinan expresa nan preocupacion, ta un bofta nan ta hanja cu declaracionnan insolente di parti di Gobierno.

No tin placa pa nos grandinan y esnan mas vulnerabel den nos comunidad manera esnan cu ta cobra un sueldo minimo, esnan cu ta cobra onderstand etc. Pero si pueblo por a tuma nota cu casi 16 miyon florin ta bay na 2 ruman di un solo minister!! Pero pa e pueblo si no tin. Todo lo contrario medida y mas medida pa asina por sigui cu e fiesta di deroche di fondonan publico na friends and family, e parlamentario ta termina.