Awe nos ta tuma nota cu a bira e di cuater (4) dia cu tradadornan publico, ta sali ariba caminda pa exigi gobierno pa cumpli cu nan. Lamentable di tur e asunto aki ta, cu trahadornan mester a subi caya pa e gobernantenan habri wowo y orea pa scucha y mira. Asina mes e gobernantenan kier bin ta hunga wega di kaki sconde. Ki hilaridad awe cu nos ta den un decada nobo, nos ta na aña 2008 y ainda un grupo di trahador mester sali demostra, pa gobierno cumpli cu nan derecho, e derecho di e clase trahado esta di risibi un ahustacion di su salario, teniendo cuenta cu costo di bida ta sigui subi.

Maestronan di scol...

Permitimi pa medio di e articulo aki, manda un palabra di pabien, na tur e homber y muhernan balente cu tin e tarea tan importante di educa nos muchanan, pa garantisa e futuro existencia di e nos dushi pais cu jama Aruba.

Homber y muhernan cu den gran forma, a sali ariba caya pa defende nan derechonan, y alabes di e forma aki sirbi como ehempel pa cada un di nan alumnonan, pa nan siña pa nunca laga ningun hende opriminan y mucho menos trapa ariba nan derecho. Awe nos por mira un biaha mas cu pa e gobierno di Nel lo mas importante ta placa. Boso por a tuma nota cua ta e sindicantonan cu gobierno a hiba corte, tur menos S.I.M.A.R. Si nos tuma nota di e peticion di gobierno tabata como lo siguiente, mester percura pa e wafnan y aeropuerto keda habri, esta e puntonan caminda nan ta haña entrada, PLACA, esaki ta importante pa Nel.

Pa gobierno “Nel y Marisol” no ta nada importante cu maestronan ta welgando, no ta importante cu muchanan ta na cas sin haña educacion. Ta pesey no ta importante tampoco pa manda S.I.M.A.R corte. Pero nos cu ta traha den educacion sa esey caba, nos sa cu pa e gobierno aki educacion di nos jiunan no ta importante.

Un lucha hustifica...

Pa medio di e articulo aki mi kier a dirigi mi mes na tur empleado publico y muy especialmente na tur maestro di scol. No laga ningun gobierno trapa ariba bo derechonan, mi kier a invita Boso tur pa uni Boso mes na e lucha sindical aki, cu ta pa un miho futuro pa Bo y Bo famia. Na mayornan mi kier a pidi nan comprension y apoyo, pa e dianan difícil aki cu nan ta pasando aden, mirando cu e muchanan no tin scol. Pero un cos ta sigur cu loke maestronan ta luchando pe ta nan derecho y no ta haciendo cos di bon bida. E welga aki ta algo historico pa bo yiu, kende tin cu conviví den un forma masha peculiar, mirando cu su maestro no tei pa dune educacion. loke ta haci esaki mas impresionante, ta cu e mucha tambe ta siña comparti y conbibi momentonan importante den bida di su maesto o maestra kende ta manera su di dos mama of tata. Esaki sigur lo fungi como ehempel pa e mucha, pa e sa cu e tin derecho y cu e mester defende esakinan y no permiti ningun hende falte respet y sigur pa no laga ningun hende prive di su derechonan.