Unda cu mi a puntra ken tabata Casio Casildo Lacle, e forsa silencioso tras di e conocido Digna Lacle-Herrera, a duna mi e mesun contesta: “Casio tabata un homber pret, alegre, yen di chiste tur dia…un bon hende...un hende ‘zacht’. Casio cu Digna tabata manera ‘tortelduifjes’ cu otro.” E palabranan aki a conmove mi curason y den nomber di mi partido AVP, mi kier a duna reconocimento na un persona cu tabata e baranca riba cual nos Digna, kende nos di partido ta adora y ta carga den nos plant’i man, a construi su bida y saca su forsa pa, como hende muhe, por a logra asina tanto den un mundo domina pa hende homber: e mundo di politica. E forsa keto aki tabata tambe fuente di inspiracion pa Digna por a skirbi su poesianan atrabes di aña y keda activo te na edad respetuoso, aportando na su comunidad. Sera conoci cu su secreto, su alma , su amor y su baranca den tempestad di bida: Casio Casildo Lacle.

Casio a cuminsa traha na Lago como chabalito di 17 aña. Na cuminsamento el a haci trabounan simpel, pero demostrando ya caba su forsa interno, su perseverancia pa crece y su orguyo y stimacion propio di e Arubiano di antes, 40 aña despues, Casio a sali for di Lago como Superintendent, cu un record di solamente 3 dia di AO riba su nomber. Tres dia so Casio a keda sin bai traha den henter un trayectoria di 40 aña. Un logro sigur di elogia y respeta. Despues cu el a baha cu pensiun, Casio tabata ocupa su mes cu trabounan den y rond di cas, yudando Digna, drechando cos den cas, trahando den cura, cuidando su matanan. Tur dia e tabata tira cuminda pa e paharanan cu tabata bula den aire liber, y na monton nan tabata warda nan bon wardado sali pafo cu nan cuminda. Manera un warwaru di hala, pata y pik nan tabata baha riba e cuminda, pa despues bula bai manera un mancha shinishi den shelo, cucurukiando felis y contento.

Casio tabata pone hende hari. Di cualke cos e tabata haci un chansa y su bisiñanan tabata bai cerca dje, djis pa e pone nan hari y lubida nan problema, lubida nan verdriet. Casio tabata tin e don aki. Lamentablemente Dios a yamele cerca dje demasiado tempran. Kisas E tabatin mester di un hende pret pa trece poco bida y zjeito den Su Reino. Mundo a bira demasiado serio cu hopi tristesa, hopi maldad. Casio tabata un homber di oracion kende tabata biba segun su Bijbel, segun su Dios. Den tur boso tristesa, Digna, su yiu y nietonan; awe boso por ta felis pa tin un Angel den shelo pa cuida y guia boso den e mundo dificil di nos. Un imagen cu lo keda graba den mente di su famia y su amigonan pa semper, y for di cual lo brota consuelo, ta Casio, sinta pafo di cas ‘pa coi biento di atardi’, wardando su paharitonan yega cerca. Sigui su bon ehempel, su bon pasonan cu el a laga atras pa boso y warda su recuerdonan den boso curason.

Den nomber di Partido A.V.P. y specialmente di su lider mr. Mike Eman, nos ta extende palabranan di profundo condolencia na Digna, su yiunan, nietonan, demas famia y amigo cu tabata conoce Casio y a stimele sin fin. Pa Casio sosega na paz den Reino di Señor.

Partido AVP

Skirbi pa Yolanda Croes,

cu un danki na tur cu a yuda aporta na e homenahe aki.

8 di april 2008