Negligencia di Minister di Finansas?

Na momento cu mas informacion y documentonan relata na AZV ta bini disponibel , ta surgiendo e pregunta cu si un parti di e perdida di Afl. 25.4 mln cu Pais Aruba a sufri door di e deficit di AZV por ser cataloga como consequencia di negligencia. E ponencia aki ta ser substancia pa e hecho cu Minister di Finansas te na final di november 2007 - segun su propio declaracion den medionan di comunicacion - ta hanja sa cu e deficit den e Fondo di AZV ta Afl. 25.4 mln mas hopi cu e Afl. 4.9 mln cu a presupuesta pa 2007. Si un aumento di e deficit 2007 di AZV cu Afl. 25.4 mln – un aumento di 518 porciento - no ta capta atencion di e Minister di Finansas, ta cuanto mas hopi e deficit den e Fondo di AZV mester subi anto pa capta su atencion?

Esaki ta conduci na e siguiente punto: Minister di Finansas tabata suficiente interesa pa a informa su mes over di e situacion financiero di e Fondo di AZV durante 2007? For di su reaccion sorprendente na November 2007 no por conclui otro cu e promer cu 28 november 2007 e no a puntra con ta bai cu situacion financiero di AZV over di 2007. Si Minister di Finansas a monitor di serca e situacion financiero di e Fondo di AZV over di 2007 - manera articulo 36 lid 2 di LV AZV ta duna espacio – e lo por a hasi tur su esfuerzo pa trece aden e Afl. 5 mln di naheffing 2007 di prima di AZV, segun e Jaarrekening di AZV, reduciendo asina e perdida pa Pais Aruba. Den mi concepto e forma aki di proceder ta uno negligente cu no ta sirbi e interes financiero di Pais Aruba, y cu a costa Pais Aruba mas hopi di locual tabata necesario. Ta kende su interes Minister di Finansas ta sirbiendo cu e actitud negligente aki?

Negligencia di otro actornan?

E rol di Minister di VMAVZ, di Raad van Commissarissen y di e Uitvoeringsorgaan di AZV den henter e asunto di e deficit 2007 di e Fondo di AZV ta bira dudoso na momento cu Minister di Finansas ainda na November 2007 no ta al tanto di e situacion financiero critico den 2007 di e Fondo di AZV. Paso, apesar di e negligencia di Minister di Finansas pa monitor e situacion financiero di AZV, ta e deber di e Uitvoeringsorgaan, conforme articulo 38q lid 1 y 38r lid 1 pa informa Minister di Finansa imediatamente di cualkier situacion financiero critico den e Fondo. Ta tarea di Raad van Commissarissen pa tene toezicht ariba e beheer y algemene gang van zaken di e Uitvoeringsorgaan, y interveni ora ta necesario pa juda mantene un doeltreffend y doelmatig beheer di e Fondo. Minister VMAVZ na final responsabel pa e uso optimal di fondonan publico cu ta aloca bou di su presupuesto na e Fondo di AZV.

Pa un deficit presupuesta na Afl. 4.9 mln por crece te na Afl. 30.3 mln durante 2007 sin cu Minister di Finansas tabata al tanto te na November 2007, diferente di e actornan involucra mester por a ignora of “misread” hopi señal durante diferente lunanan anterior. A base di e evidencia disponibel ta parse cu Uitvoeringsorgaan AZV, e Raad van Commissarissen y Minister VMAVZ a faya di mira e situacion financiero critico di e Fondo di AZV mas tempran, pa por a interveni pa minimalisa e perdida. Pa un parti e Minister di Finansas ta admiti esaki den su carta pa Parlamento di 6 februari 2008, bou di number A-163. Conhunto cu articulo 38q lid 1 y articulo 38r lid 1 cual ta stipula cu den caso di un liquiditeitstekort of un dreigend structureel tekort, e Uitvoeringsorgaan ta stel e Minister belast met Financien y e Raad van Commissarissen onverwijld in kennis,” por conclui cu ta den e di cuarto parti di 2007 e Uitvoeringsorgaan AZV a hanja bista ariba e situacion financiero critico di e Fondo di AZV, pa asina por a meld esaki dia 28 november 2007. Pregunta ta: Ta con por ta posibel cu e control financiero di AZV ta faya di e estado aki? ki typo di toezicht e Raad van Commissarissen y e Minister VMAVZ a tene ariba e Uitvoeringsorgaan AZV? Ta di berdad cu e Raad van Commissarissen y e Minister VMAVZ a bin hanja sa te dia 28 november 2007 di e situacion financiero critico den e Fondo di AZV, of tabatin posibilidad cu nan tabata sa mas promer di e situacion y no a meldt aan esaki mas tempran na Minister di Finansas?

Responsabilisacion di negligencia

Cu no por a evita un crecimento di e saldo negativo den e Fondo di AZV no ta ser cuestiona. Locual si ta cuestiona ta e hecho cu evidencia disponibel ta demonstra cu e actornan relevante no a hasi esfuerzo conhunto desde un inicio pa monitor e situacion financiero di e Fondo di AZV y trata na minimalisa e deficit den dicho Fondo. Cu e actornan aki tabata sa of no desde un inicio di e situacion critico den e Fondo di AZV pa 2007, no ta hasi e situacion menos complica. Ta juist sorprendente cu e deficit pa 2007 den e Fondo di AZV a keda limita na Afl. 30.3 mln so, considernado e forma di proceder di e actornan relevante aki. Pero mas sorprendente ta e hecho cu awor kier pasa e costonan di beheer y toezicht deficiente pa e asegurado paga. Promer cu tuma un decision asina, sigur lo mester hiba un discussion publico pa cu e responsabilidad den e beheer y toezicht di e Fondo. Si continua cu e forma negligente di beheer y toezicht di e Fondo di AZV, lo no tarda mucho pa e deficit bolbe crece despues di tuma cualkier medida.

A la ves, Parlamento den su totalidad mester asumi su responsabilidad di controla implementacion di e leynan di presupuesto di 2008 en adelante. Considerando cu Gabinete Oduber te cu ainda no ta responsabilisa su maneho financiero mediante cuentanan anual, ta bira essencial pa Parlamento monitor di serca y na tempo e gastonan cu Gobierno ta realisando den 2008 como tambe e realisacion di entradanan presupuesta den e mes un anja. Di e forma aki ta evita cu na final di anja ta hanja sorpresanan manera esun di AZV. Pero mas cu tur, ta importante pa Parlamento exigi responsabilisacion for di e dos ministernan concerni pa nan actonan cu a conduci na 2007 den un perdida di Afl. 30.3 mln den e fondo di AZV.