Parlamentario pa fraccion di AVP, Alexander Tromp ta hanja cu Gobierno a perde tur sentido di responsabilidad ora ta declara publicamente cu empleadonan publico y maestronan no tin derecho riba pago di indexering! Ta bon pa Minister-president puntra su huristanan cu ta rond di dje kiko enfacto significa e asina llama “algemene beginselen van behoorlijk bestuur”! Parlamentario Tromp ta sigui enfatisa cu un di e puntonan cardinal cu ta ancra den dicho algemene beginselen van behoorlijk bestuur (reglanan cu ta regarda bon Gobernacion) ta e vertrouwensbeginsel y e rechtszekerheid (e confiansa cu durante anjanan a wordo crea di tin cierto derechonan)! Y aki e punto cardinal ta dikon e sindicatonan den accion ta bini ta ganando nan caso constantemente den corte di tin derecho pa continua cu e lucha cu nan ta bini ta hibando caba pa mas di un luna !

Parlamentario Tromp ta splica cu fuera durante anjanan cu e empleadonan publico y maestronan a hanja nan indexering (principalmente durante Gobernashon di signatura di AVP) y cu e confiansa a wordo crea di tin derecho riba tal tambe, na anja 2001 Gobierno di Nel Oduber a hasi un propuesta na e sindicatonan cu ta representa e empleadonan publico y maestronan cu nan mester bay tuma cierto medidanan pa asina sanea e situacion financiero cu nan a hanja pais Aruba aden. Cu e mentira aki nan a logra convence e sindicatonan pa “vries” e indexering pa 3 anja !! Aki claramente parlamentario Tromp ta enfatisa cu Gobierno a admiti cu e empleadonan publico y e maestronan tin derecho riba indexering, pasobra si no tawata asina anto Gobierno na e momento ey mester a bisanan cu nan lo bay elimina indexering pasobra e no ta un derecho!! Pero Gobierno den su gloria e tempo ey cu nan 12 asiento a admiti cu indexering ta un derecho y priminti tambe cu ta pa solamente 3 anja e empleadonan publico lo no hanja indexering. Segun reglanan di bon Gobernashon (algemene beginselen van behoorlijk bestuur) a incentiva e confiansa (vertrouwen) y e rechtszekerheid na e empleadonan publico y maestronan cu indexering ta un derecho!!

Parlamenario Tromp ta hanja cu ta un berguensa cu awor cu mas di 7 anja a pasa y cu e sindicatonan ta bati porta di Gobierno pa locual a wordo priminti na nan, Gobierno tin e credibilidad di jama nan pa tur sorto di cos y insinua cu nan no tin derecho riba indexering. Tromp ta puntra pakiko no a bisanan esey na anja 2001 ? Ta pone pueblo corda e ta afamado dicho di minister-president cu campanja ta un cos y gobernashon ta otro cos! Ta usa como excusa cu no tin placa. Berdad kisas no tin placa pero con por tin placa si miyones y miyones ta wordo destina pa friends and family!! Miyones na huurmento di edificionan, miyones na pagamento na abogado Croes, miyones cu a somenta for di Landslaboratorium, miyones na dunamento di trabao den e aparato gubernamental y Aruba huis etc.etc.. Berdad tin e dicho cu for di un “kale kip kan je geen veren plukken”!! Pueblo tin di puntra su mes ken ta esnan cu a despluma e kip ey!!! Y awor ta e empleadonan publico y maestronan tin di carga e consequencia di e maneho desastroso di Gobierno. Parlamentario Tromp ta spera cu pronto sano huicio lo prevalece y cu Gobierno asumi su responsabilidad como donjo di trabao pa asina llega na un solucion pa asina nos Pais Aruba no sufri di e danjonan irreparabel cu e welga por causa nos pais, pasobra alfin al cabo Gobierno ta esun cu lo ta resposabel pa cu esaki, Parlamentario Tromp ta finalisa.