Departamento di Enseñansa ta impone mucho loke e kier riba scolnan. Departamento di Enseñansa kier controla tur cos. Departamento di Enseñansa y Minister no ta stimula mehoracion di enseñansa den scolnan mes. Un ehempel ta loke maestronan di scol a purba haci na diferente scol entre nan na scol basico Mon Plaisir. Mester traha espacio den presupuesto pa paga maestronan di scol miho. Esaki tabata algun di e puntonan di critica cu maestronan di scol a trece dilanti den e programa di radio di partido AVP di diadomingo merdia. Sinta na un mesa rondo, lider di AVP Mike Eman, parlamentario Andi Lee, maestornan di scol basico Selpha Kuiperi, Leo Sybrandy, maestronan di scol basico y miembro di AVP Marlon Sneek, maestro di scol y miembro di AVP Desiree Croes-Vermeulen y miembro di AVP Rene Herdé, a trata diferente tema importante di enseñansa.

Renobacion di enseñansa

Leo Sybrandy a mustra cu e critica mas importante riba renobacion di enseñansa manera ela bai na Aruba no ta e contenido di e renobacion. E ta mas e forma cu Departamento di Enseñansa ta maneha esaki. Basicamente Departamento di Ens. kier controla tur cos y pesey kier prescribi tur loke e scolnan tin cu haci. E scolnan ta frustra door di e forma di traha aki, pasobra no ta tene cuenta cu e diferencia entre e muchanan, cu e posibilidadnan y limitacionnan di scolnan, cu e profesionalismo di e maestronan y cu iniciativa di scolnan mes. Ta bini aserca cu loke Departamento di Ens. ta presenta hopi biaha ta masha academico y hopi maestro di scol kier un asercamento mas practico. Resccionando riba e remarcanan aki Rene Herdé a reconoce cu esaki ta un critica hopi scucha y cu lo mester yega na un forma cu ta haci mas uso di e experiencia y profesionalismo di e maestronan di scol den e proceso di renobacion. E rol di Departamento di Enseñansa lo mester bira mas un di duna sosten, guia y facilita e proceso di renobacion den scolnan. Andy Lee a remarca cu den e proceso aki tambe mester tene cuenta cu e Directivanan di scol cu tin un responsabilidad pa loke ta sosode den na scolnan. E directivanan di scol lo mester hunga un rol mas activo den e proceso aki.

Salario di maestronan

Mike Eman a mustra riba e echo cu gobierno Hulandes a saca un suma grandi di mas cu 1 biyon pa mehora e salario di maestronan di scol. Marlo Sneek a mustra cu den e presupuesto alternativo di fraccion di AVP a hinca un suma pa dos aña caba pa mehora e salario di maestronan di scol. Ela mustra cu e minister mester busca forma den su presupuesto pa crea fondo pa mehora e salario di maestronan di scol. E cantidad di maestro cu ta bai sali cu pension den e añanan cu ta bin e e cantdad di maestro di scol cu tin mester ta exigi esaki. E indexering riba su mes mester bin. Mehoracion di e salario ta banda di esaki!

Educacion civil

Desiree Croes-Vermeulen y Mike Eman a mustra riba e importancia di educacion pa responsabilidad civil di tur hoben. Den e contexto aki Mike Eman a mustra riba proposicion cu fraccion di AVP a haci pa introduci e asina yama ‘maatschappelijke stage’ na Aruba. Desiree a mustra cu e hobennan mes ta masha interesa den por ehemple e welga di trahadornan di gobierno y nan maestronan di scol y ta sigui esaki di serca. Desiree:

Educacion civil ta masha importante y den henter enseñansa e mester haya mas atencion.

Otro temanan cu a wordo discuti ta e importancia di comunicacion entre scolnan, e renobacion di enseñansa pa no siña pa siña so, pero pa siña habilidadnan pa bida tambe. Mirando e importancia di enseñansa lo dedica mas programa na e tema aki.