Rene ‘Baba’ Herdé di AVP

Siman pasa tabata un siman di regreso pa un pasado tristo y experiencianan nobo pa nos pais. Di repeticion di situacionnan cu nos mester laga atras y desaroyonan nobo cu ta duna speransa cu nos futuro lo ta miho. Siman pasa nos a wak e contraste entre e politica bieuw isola den hokinan antigua basa riba division di pueblo y e forsanan popular uni tras di un meta comun, cu ta trancede tur frontera di partido, grupo profesional, bario, rango y posicion social. Nos a wak e politica bieuw di forsa bruto, di arogancia y hipocresia, di atake personal y di busca confrontacion, di sconde berdad keriendo cu henter pueblo ta un set di hende kens cu ta vota manera lamchi ciego un biaha cada cuatro aña. Di otro banda nos a wak e lasonan di amigo y coleganan, di hende cu no tabata conoce otro, cu a uni den un voz fuerte pa demanda reconocemento y un reparticion husto di e rikesa di nos pais. Y nan kier e AWOR! E accionnan di protesta di trahadornan di gobierno, maestronan di scol, trahadornan di fundacionnan y pensionadonan, ta pa haya compensacion structural pa e perdida di forsa di compra. Pero na caminda e falta di sentido di realidad y sinceridad di gobierno, a haci cu e accion a haya un meta aserca. Esta di exigi reconocemento di e lugar di trahadornan den duna contenido na democrasia den e pais aki y den reparticion mas husto di tur loke nos pais tin y ta produci! E conciensia aki ta un mensahe cu tur hende mester tene bon cuenta cune!

ARROGANCIA Y IGNORANCIA

Tur e sucesonan di e simannan cu a pasa a mustra un gobierno cu no tin ningun gana di yega na un solucion y un falta di conocemento grandi serca gobernantenan di con pueblo ta biba. Un arrogancia y ignorancia hunto! E expresionnan di minister di enseñansa y di minister presidente ta ilustrativo pa esaki. Ta inacceptabel cu na e altura aki un gobierno cu tin siete aña sinta ta purba tira culpa pa e estado di scolnan riba un directiva di scol. Ta totalmente inacceptabel cu e minister di enseñansa ta purba bruha hobennan door di menasa cu si paga e maestronan indexering no lo drecha e scolnan. Ta totalmente incomprendibel y di desaproba cu minister presidente ta purba trece division den pueblo door di manda alumnonan bai den accion contra nan maestronan. E atakenan puramente personal di minister di enseñansa contra e maestro di scol y lider sindical di SIMAR, ta un berguensa! E ta un regreso na e politica mas baho cu nos a yega di conoce. E ta un muestra di falta di argumento pa defende su propio punto di bista den e conflicto laboral aki, y di purba convirtie den un problema personal entre ‘nan y nos’. E intento aki di dividi pueblo a faya! Ni e lidernan sindical, ni e trahadornan, ni pueblo y ni e ‘militancia’ di nan partido a cai den e wega baho aki. Tur e expresionnan aki di ministernan ta demostra e arrogancia y falta di conocemento di bida den nos pais. Y cu e actitud aki nan ta goberna nos pais!

POR OTRO?

E peticion pa trato husto di trahadornan a bira un conflicto laboral cu gobierno por y mester a evita! E forma cu ministernan ta atende e conflicto laboral y nan expresionnan ta pone hende pensa si e dia lo yega cu e situacionnan aki lo no sosode mas na Aruba. Ami ta nenga di kere cu nos mester keda na e nivel di e minister di enseñansa y prome minister, cu a haya bon atrobe pa ataca lidernan sindical personalmente. E lidernan sindical y trahadornan a demostra e simannan aki con SI por atende diferencianan di opinion. Esta door di busca solucion racional en bez di confrontacion! Mi ta nenga di kere cu nos no por tin gobernantenan cu ta compronde cu nan funcion no ta pa sa tur cos, ni pa por tur cos, pero si pa busca pa haya sa kico ta pasa den nos pais y pa traha cu tur hende cu por yuda trece solucion pa poblemanan di nos pais. E simannan cu a pasa trahadornan di tur color politico a demostra cu nos por traha hunto pa metanan comun! Mi ta nenga di kere cu nos no por tin un minister di enseñansa cu ta compronde e importancia di enseñansa pa desaroyo personal di tur nos hendenan, cu ta compronde e rol cu enseñansa tin pa hunga den elevacion di nos economia, pa mehoracion di condicionnan di bida di henter nos comunidad, pa ampliacion di nos cultura y fortificacion di moralidad den nos pais. Mi ta nenga di kere cu nos no por tin un minister di enseñansa cu ta defende cada cen pa enseñansa, incluso pa e trahadornan den enseñansa, enbez di menasa di corta den inversionnan den enseñansa pa purba spanta hende! Mi ta nenga di kere tur esey, pasobra e simanan cu a pasa trahadornan di gobierno y di fundacionnan, alumno y maestronan, hoben y pensionadonan, homber y muhernan, a demostra cu por kibra bareranan tradicional cu a tene nos dividi y uni tras di metanan comun y husto pa tur, sin distincion! Pesey mi ta convenci cu aki na Aruba nos por miho cu loke nos a wak siman pasa!