Rene ‘Baba’ Herdé di AVP

E dianan aki trahadornan di tur sector publico y di enseñansa ta protesta contra gobierno cu a nenga nan compensacion pa aumento di costo di bida durante siete aña. Gobierno nunca a reserva placa pa haci esaki. Esaki kier men cu e nunca tabata tin plan pa haci esaki. Gobierno no a pone nada den presupuestonan pa ahustacion di salario durante di siete aña, cu kier men simplemente cu gobierno no a wak esaki como algo necesario. Esaki so caba ta un muestra di ignorancia di con hende ta bida y traha riba nos isla y un negligencia como doño di trabou pa su trahadornan. Pero no solamente den nan salario e trahadornan a worde afecta severamente. Gobierno como doño di trabaou a mustra un negligencia grandi pa condicionnan di trabou, productividad, desaroyo profesional, maneho di personal transparente y husto, y hopi otro aspecto di e condicionnan di trabou di su trahadornan y di maestronan di scol.

Un di e gruponan cu ta wordo afecta den un forma particular ta e maestronan di scol. No ta solamente cu nan salario no a wordo ahusta na costo di bida. E structura di salario di maestronan di scol no ta duna espacio pa crece mucho. Esaki tin como consecuencia cu e maestronan ta haya falta di posibilidad pa bai dilanti. E unico forma pa bai dilanti ta door di sigui studia. Pero e interes pa bolbe bek den enseñansa y bolbe keda pega despues di algun aña, ta haci cu maestronan ta laga e profesion di maestro di scol y scohe otro cu si ta duna oportunidad pa crece profesionalmente y financieramente. Ta pa e motibonan aki entre otro a tuma e desicion na aña 2000/2001 pa cuminsa restructura e sistema di salario di maestronan di scol. A busca un compania Hulandes cu hopi experiencia den e ramo aki pa asisti Aruba den esaki. Awe sieta aña despues ainda e trabou aki no ta cla! E maestronan di scol ta den e mes un posicion sin posibilidad of incentivo pa crece den nan profesion y financieramente. Maestronan no solamente a bai atras, pero no ta wak con pa bai dilanti. E situacion aki a haci cu no tin suficiente hoben cu ta scohe pa e profesion di maestro y un grupa grandi di maestronan di scol ta yegando e edad di pension sin cu tin suficiente maestro hoben pa remplasa nan.

KICO NOS POR SIÑA DI HULANDA

Maestronan di scol na Hulanda tabata den un situacion parcialmente similar. Gobierno Hulandes a laga analisa esaki y a propone na maestronan di scol diferente incentivo financiero y di desaroyo profesional pa crea condicionnan di trabou cu ta hacie mas atractivo pa scohe pa bira maestro di scol of pa keda den e profesion. E siman aki gobierno, directivanan di scol y sindicatonan di maestronan a yega na un acuerdo riba mehoracion di condicionnan di trabou incluso di aumento structural di salarionan. Kico nos na Aruba por siña di esaki? Corda cu no ta bai na prome lugar pa e haltura di e aumento di salario, pero si pa e echo cu gobierno Hulandes ta reconoce e importancia di bon condicionnan di trabou pa su trahadornan. E ta nifica cu gobierno Hulandes ta enfatisa e importancia di enseñansa y e necesidad di atrae mas hoben pa scohe un carera den enseñansa. E ta nifica cu gobierno Hulandes no a warda pa e situacion yega na un crisis y confrontacion, pero a scohe pa atende tur problema na mesa y pa busca solucionnan hunto cu tur esnan concerni. E ta nifica cu gobierno Hulandes a planea un maneho pa soluciona problema y a reserva placa pa haci esaki. E ta nifica cu gobierno Hulandes a scohe pa duna prioridad na enseñansa door di inverti hopi placa pa mehora enseñansa, entre otro door di mehora condicionnan di trabou di su trahadornan den enseñansa. E maneho aki pa mehora condicionnan di trabou no ta ensera e salario so, pero tambe e cambio den e structura di e salarionan pa crea mas oportunidad pa crece den e profesion y den salario; pa stimula maestronan pa haci otro funcionnan y haya reconocemento pa esaki. E maneho ta dirigi riba e meta final di duna miho enseñansa door di sitimula maestronan di scol pa crece profesionalmente bou condicionnan atractivo.

E MANEHO NA ARUBA

Lamentabelmente e maneho cu nos a wak aki na Aruba no ta refleha nada di esaki. Al contrario. Nos a wak menasa enbez di incentivo, ataque enbez di motivacion, isolacion di maneho enbez di inclusion di tur concerni, propaganda personal enbez di reconocemento di e importancia di y prioridad na enseñansa. Pero laga nos no perde speransa. Nos sa cu nos por miho!