Parlamentario di AVP Benny Sevinger:

Parlamentario di AVP Benny Sevinger a declara cu ta increibel con leu decesperacion di prome minister Nelson Oduber ta yega . Despues di yama e sindicatonan den accion pa tur tipo di traidor y cu nan no tin ningun derecho, nan ta irresponsabel. Awor ta bai mas leu cu intimidacion, awor ta bay na terorisa individualmente e empleado publico. Nel ta kere cu bai directamente na e empleadonan obligandonan pa acepta e Afl.100,= cu e kier duna, ta bai kibra y caba cu e lucha di e sindicatonan. Tratadonan internacional y den un pais democratico Gobierno of cualkier compania ta sinta na mesa y negosha cu representantenan di trahadornan y nan sindicatonan. Ora abo como gobierno no kier respeta e derechonan di sindicatonan cu ta ligitimo representante di e trahadornan,anto gobierno ta bai over na viola e derechonan sagrado aki di e trahadornan, bo ta habri caminda pa ningun donjo di trabao respeta e sindicatonan cu ta representa nan trahadornan. Mas ainda gobierno ta violando leynan cu ta hancra den nos leynan di CAO y den tratado di ILO. Na e momentonan aki gobierno no kier bai na mesa y ta busca campaniadornan, cordinadornan pa bai directamente intimida trahadornan y forzanan pa firma y acepta e propocicion di Afl.100,= y tambe tur otro puntonan cu lo tin consecuencia pa nan mes.

Esaki no ta nada otro cu terrorisa y intimida e empleadonan directamente.Esaki ta loque ta wordo categorisa como terrorista di estado, esdecir cu gobierno di un pais ta usa tacticanan pa terrorisa un sierto grupo di persona. Un empleado cu ta miembro of no di sindicato ta hanja su mes bao precion pa firma un cos cu e no ta diacuerdo cu ne, pero pa no core e riesgo cu Nel Oduber y su gobierno ta bai persigie y cu lo tin concecuencia pa su trabao, ta firma. Un acto cu tur hende mester condena, un acto di cobardia cu ta tipifica mentalidad di prome minister Nelson Oduber.

Parlamentario di AVP Benny Sevinger ta spera cu e sindicatonan tanto esunnan den accion como esunnan cu no ta den accion no accepta e forma aki di terrorisa y intimida e trahadornan. Tur gremionan tanto sindical como gremionan commercial como tur instancia cu in un responsabilidad den nos comunidad tin cu condena e forma aki di Prome minister Nelson Oduber y su gobierno. Esun cu no para y condena e terrorismo gobernamental aki lo ta complice y parti di e decadencia cu e gobierno aki a hinca nos.