Preguntanan di miembro di Parlamento, mr. M.G. (Mike) Eman na Minister di Asuntonan General, N.O. (Nel) Oduber, segun articulo 59 di Reglement van Orde voor de Staten van Aruba jo.Artikel III. 17 di Staatsregeling van Aruba.

Durante e welga cu ta andando na Aruba pa mas di un luna caba di e empleadonan publico, e pensionadonan di gobierno y e empleadonan di fundacionnan di Aruba, continuamente nos ta tende e expresion “no work, no pay”, principalmente lanza for di direccion di Gobierno di Aruba. Ta corecto cu gobierno tin e intencion pa kita salario for di e empleadonan ku a welga pa e dianan cu nan a welga, sin tene cuenta cu ta trata di un welga largo dor di cua ta trata di sumanan grandi?

Den caso cu e contesta riba pregunta 1 ta afirmativo, Gobierno di Aruba por compronde cu si un doño di trabao kita un suma grandi di salario di e trahador, cu e trahador ey ta bin den dificultad grandi pa cumpli cu su debernan financiero di luna?

Gobierno di Aruba ta di opinion cu lagando un trahador sin un gran parti di su entrada, mientras cu e ta den bo servicio y lo keda den servicio tambe despues di e welga, ta un acto cu por worde considera como inhumano y cu ta en pugna di e espirito di e Tratadonan di ESH y tambe di ILO?

Gobierno di Aruba no ta comparti e opinion cu como un bon dunador di trabao, cu semper mester tene e bienestar di su trahadornan na bista, gobierno mester evita di hinca un trahador den un situacion penoso asina?

Gobierno di Aruba ta na altura cu den pasado semper e asunto di dianan di welga cu mester a worde kita for di trahadornan, semper a keda regla na un manera satisfactorio después cu a jega na un acuerdo ?

No ta conoci serca Gobierno di Aruba cu den pasado a keda sin kita e dianan di welga of kitamento di placa di e dianan di welga a worde parti riba diferente lunanan, ta worde compensa cu dianan di vakantie, cu oranan di overtime traha of cu dianan di ATV y te hasta a yega di wordo compensa cu oranan extra pa “haal in” e trabaonan atrasa?

Gobierno no ta haya cu reconocemento di e derecho di welga ta ensera tambe cu mester tin un comprension sincero pa e manera cu kitamento di e dianan di welga mester tuma lugar?

Gobierno di Aruba ta conciente cu Landsverordening materieel ambtenarenrecht(LMA) den articulo 111 ta stipula cu no por retene mas cu ½ di e bezoldiging y cu art. 114 inciso 1 ta stipula cu e salario di un empleado publico por worde reduci cu solamente 1/3 parti. Asina cu si e mitar di locual mester wordo reten eta mas cu 1/3 parti di e bezoldiging a jega e limite di e retencionan ?

Gobierno di Aruba no ta di opinion cu encaso ta retene ariba e bezoldiging tin cu tene cuenta cu e “overuren” di diferente trahadornan manera juez a remarca den e sentencia di diabierna ultimo ?

Gobierno di Aruba no ta di opinión cu e trahadornan mester tin e posibilidad di cambia dianan di welga pa dianan di vakantie y ATV, pasobra nan tin derecho di disidi ariba e uso di e dianan aki ?

Gobierno di Aruba no ta mira cu gobierno tin cu tuma e siguiente puntonan seriamente na concideracion ora di tuma un posicion pa cu e dianan cu tabata tin welga: