Lider di AVP, mr. Mike Eman:

“Comunidad simpelmente no por carga e peso mas di Gabinete Oduber. E simanan di accion aki a demonstra cu pueblo a libra su mes di oprecion y miedo, Aruba ta para atrobe fuerte, uni y determina pa su derechonan y pa worde trata cu duignidad. Asina lider di AVP, mr. Mike Eman a comenta riba e sosedidonan di ultimo simanan.

E lider di AVP, mr Mike Eman ta bisa cu Gabinete Oduber a tuma decisionnan penoso contra di tur deseo y conseho. Si Gabinete Oduber kier un dialogo nacional e mester cuminsa revoca e medidanan aki. Sinta na mesa cu e medidanan aki ta acceptacion di easkinan y AVP no ta bai haci su mes complice di e sufrimento di pueblo. Nos a entrega un Prespuesto Alternativa caminda nos ta preuba cu cifra cu cosnan por bai otro. Cu un otro maneho pueblo lo no ta victima, pero lo haya un alivio y perspectiva pa futuro. Den AVP su determinacion pa trece cambio, di no ta complice, pueblo ta haya su speranza cu cambio lo bin, e lider di AVP, mr. Mike Eman a expresa.

Aruba a haya cu Gabinete Oduber un gobierno cu a dicidi cu su prioridad ta pa faborece esnan rond di dje a costo di tur cos. Sin escrupulo, sin moral, sin etica y sin pena pa nada y pa ningun hende a dispidi den seis anja e fortuna di e pais aki, e sudor di pueblo y a hypoteca nos futuro pa enriquece familiarnan y amigonan. Ora placa a caba, 800 miyon extra di entrada, a fia y a redobla debe di pais Aruba cu 1000 miyon. Ora placa a caba atrobe a cuminsa bende propiedadnan di pais Aruba, tur accion di Aruba den Hyatt, den SETAR y den Raddisson, mas di 300 miyon na propiedad di pais Aruba. Asina mes placa no a yega pa nan. A bin cu medida. Uno tras di otro y finalmente introduccion di e carga fatal, BBO.

“Pa sigui kier haci atraco riba reservanan di Banco Central, riba reservanan di Utilities. Aruba a haya un prijs. Gobernantenan di Gabinete Oduber a bira e agentenan di e benta. Tin oferta di miyon, financiador na abundancia sin nomber y sin cara, spa y brug pa cada minister di e gabinete y pa e partido prestigioso cu ta sostene, pa facilita benta di pais. Con nos por a degenera asina ? Con nos ta bai para e degeneracion aki. Aruba mester di un direccion nobo urgentemente. Nos mester libra pueblo y pais di e carga aki. Nos mester haci Aruba feliz y contento atrobe. Y hunto nos por realizé”.

Den e presupuesto alternativa fraccion di AVP ta prueba den un forma cuantifica cu cos mester y por otro. E presupuesto alternativa ta un refleho di e escohencianan di maneho cu segun fraccion di AVP ta esencial pa futuro di pais Aruba. E prioridadnan di e presupuesto alternativa ta: miho enseñansa, un gobierno menos grandi, un infrastructura mas fuerte, rebaho di gastonan na un forma structura, drecha e poder di compra di pueblo, revoca BBO y rebaha e debe y interes riba debe di pais Aruba. Den total e presupuesto di partido AVP ta percura pa un realocacion di 185 miyon. Esaki na interes di inversion den comunidad, pueblo y pais.

“Den nos presupuesto alternativa nos ta haci un reduccion grandi di gasto, pasobra den e presupuesto proyecta di gobierno ningun caminda cuenta ta wordo teni cu mantencion di prosperidad di e pueblo di Aruba y e necesidadnan di e comunidad aki. Den nos presupuesto alternativa nos ta duna prioridad na e hecho cu desaroyo di Aruba ta exigi un coreccion di inversion di tanto infrastructura fisico como capital humano.E ultimo añanan e inversionnan tabata hasta insuficiente pa drecha y traha caminda nobo, edificionan di scol y otro propiedadnan y responsabilidad di pais Aruba”, e lider AVP ta expresa. E gobierno a inverti tambe masha poco den promocion di turismo di Aruba, conocimento y educacion pa nos yiunan y di e pueblo trahado. E infrastructura publico di nos economia a haya un restraso grandi. E contesta di gobierno pa bende propiedad publico, manera edificionan di gobierno y partinan di waf, AVP ta rechasa esaki.

Mester drecha e retraso den inversionnan, tanto esnan di e infrastructura fisico, como esnan di e economia di conocimento y enseñansa. Esaki ta locual nos Prespuesto alternativa ta haci. Esaki mester pone Aruba bek riba un trayecto di un fase nobo di desaroyo socio-economico.

E cifranan di presupuesto ta mustra hopi cla cu e problemanan di e deficit financiero no ta bin dor di un entrada insuficiente, cu al final de cuenta ta subi tur aña, pero ta wordo causa dor di gastonan enorme di e aparato gubernamental. Aruba por inverti den enseñanza si nos duna e schoolnan, klas di nos jiunan, nan pen, nan buki, nan maestro prioridad riba fortuna pa huurdonan di oficina.

Pesey den nos presupuesto alternativa nos ta corta miyones na huur y otro gastonan inecesario y pone 15 miyon extra pa inversion den ensenjanza di nos jiunan, pa mas klas nobo, mantencion di schoolnan, materiaal nobo y mas maestro. Miyones cu gobierno a gasta na previlegia famia y amigonan cu contractnan dudoso, cu nombracion y promocion politico por a bai na ahuste di salario y inversionan real cu ta mehora calidad di bida na Aruba. Placa cu cual nos por a construi careteranan grandi y importante manera e vierbaansweg di San Nicolas pa Playa, e ringweg 3 cu mester acopla na Avenida Watty Vos y core di Morgenster yega via di Ponton te na e hotelnan.

Pesey den nos prespuesto alternativa nos ta hiba un maneho financiero responsabel pa den 4 anja ahora 100 miyon pa haci e inversionnan aki y alivia e peso riba pueblo, elimina BBO, mehora e poder di compra di pueblo, reduci impuesto riba ganashi pa inversionistanan por renoba nan inversion pa fortifica e economia di Aruba’, e lider AVP, mr. Mike Eman ta splica.