Mike de Meza di AVP ta adverti

Palamentario di partido AVP, Mike de Meza, cu preocupacion ta comenta cu durante e ultimo aña e costo di energia global a aumenta significativamente y efecto pa economia na Aruba ya caba por wordo sinti si tuma nota na e aumento di productonan importa. Otro economianan grandi y chiquito rond di mundo tambe ya ta mustrando sintomanan como consecuencia di e crisis petrolero mundial.

Mayoria di paisnan a tuma y ta tumando decisionan urgente y ta hasi trabounan grandi pa purba di enfrenta y contraresta mas tanto cu por ta posibel e peso financiero cu e crisis petrolero global ta impone riba nan economia. Remarcabel ta cu e gobierno na Aruba ta den un soño profundo of no ta capaz di compronde e envergadura di e efectonan cu e crisis global ta trece cune. Esaki ta lastima ya cu e efectonan lo ta desastroso pa full e pais y no pa algun hende so. Tambe e efectonan lo ta unico den su tipo y no lo ta temporal. Si gobierno na Aruba no actua diligentemente, comunidad lo wordo enfrenta cu un sorpresa amargo yena cu tristeza. Esnan cu ainda ta kere cu Aruba tin e luho pa keda warda lo wordo mal sirbi y na fin di dia e cuenta lo ta impagable y lo ta mucho laat pa busca solucion alternativo, Mike de Meza ta duna di conoce. E politico di AVP ta splica cu un cos cu mester ta comprodibel pa tur hende ta cu e prijs di crudo no lo baha na nivelnan anterior. Reservanan mundial di crudo barata ya ta cabando y no ta descrubiendo minanan nobo di e tipo aki. Sinembargo tin tur indicacion cientifico cu e consumo mundial di petroleo ta sigui crece cu tur consecuencia desastroso pa economia di algun pais chiquito.

“Awe (masce cu ya nos ta laat na Aruba) hopi ta kere cu nos tin e luho pa sinta haci politica y discuti, pero den futuro sercano nos no lo tin ni sikiera e luho mas pa escohe corda discuti. E efectonan, un bes mas, ta desastroso y Gobierno mester cuminsa actua dilegente cu mas rapidez cu ta posible. Ya caba prijsnan di azeta crudo a kibra bareranan di US$ 119 pa bari y e ta sigui aumenta!”, de Meza ta duna di conoce.

Durante e ultimo 7 añanan Aruba a paga mas cu 2.5 biyon (2500 miyon) florin na recibo energetico total pa su economia. Mas alarmante ta cu e costo energetico total anual di Aruba na aña 2007 ta dos biaha mas cu na aña 2002 y ya e costo na aña 2008 ta indicando cu lo ta mas cu tres biaha cu na aña 2002. Esaki ta sumamente serio y preocupante si mira cu e inflacion internacional lo keda aumenta despropocionalmente riba e inflacion local cu den forma di medidanan tras di otro cu e gobierno actual ta impone riba pueblo.

Locual tambe ta di lamenta ta cu keto bai Gobierno actual no tin un maneho riba energia. Sin embargo fraccion di AVP a alerta gobierno caba pa basta tempo y a propone y deposita den forma di mocion diferente alternativa y sugerencianan pa por bini cu algun solucion pa por alivia y controla e costo di energia riba nos pueblo, p.e.:

Mike de Meza finalizando a bisa cu tambe semper ta na su lugar pa mira con e refeneria por yuda den un solucion general y structural pa cu e costo di energia na Aruba. Esaki ta algun alternativa cu ya ta riba mesa den Conseho di Minister actual. Locual si ta lastima ta cu ni Parlamento ni pueblo a nota cu e gobernantenan actual ta ehucutando algun idea. Tambe locual ta remarcabel pa mira cu e companianan estatal ta sigui inverti hopi miyones den procesonan nobo cu lastimamente lo keda usa e mesun fueloil convencional cu no ta duna ningun alivio financiero y lo keda aumenta den costo aunke cu e proceso por ta algun prociento mas eficiente cu procesonan convencional.

Articulo di relevancia na e articulo aki:

• PARTIDO AVP KIER PONE ACCION NA PALABRA

• SOLAMENTE SI ARUBA TIN UN VISION ALTERNATIVO