AVP - CRISTIAN DEMOCRATA ARUBA
   

Segun Mike de Meza, Parlamentario di partido AVP
ORA A YEGA PA E GOBIERNO ACTUAL ATENDE
CU SU PROPIO MALGOBERNACION
Gobernantenan actual no por core pa nan responsibilidad
Home > Centro di Prensa > Noticia > 20080502
 

Ya ta siete (7) aña consecutivo cu e mesun gobernantenan ta na mando pero keto bai por tuma nota cu e gobierno actual no ta asumi su responsabilidad. E gobierno actual ya pa añanan a trata di goberna dor di crea un cultura di miedo den comunidad y a purba indoctrina cu e falta di loke ta sosede na Aruba semper ta falta di tur otro y no di e gobierno actual. Sin embargo, e problema mayor na Aruba ta cu tin un Gobierno cu no tin un nocion con pa maneha e pais, Mike de Meza Parlamentario di AVP ta duna di conoce.

“Imaginabo cu e gobierno actual ya pa 7 aña nunca a pone un maneho planifica riba mesa. E unico maneho cu e gobierno aki a conoce ta uno adhoc sin un vision. Esaki ta trece cune cu e gobierno actual hamas por tin un base real pa soluciona e crisis den finansa publico cu nan mes a crea. Mas tristo ta cu Conseho di Minister actual, consistiendo di 8 minister (incl. esun na Hulanda), conhuntamente tin mas di 125 aña di “experencia” den politica y sinembargo e pais aki ta den incertidumbre riba diferente aspecto fundamental”, de Meza ta duna di conoce.
 

Aki e ta menciona cu na Aruba na e momentonan aki tin un “morele verpaupering” enorme y hamas bisto cu ta e consecuencia di e “maneho” deficiente y intransigente di e gobernantenan actual. Un caida den norma, balor y moralidad den gobernacion actual ta laga su rastronan tur dia den comunidad. Esaki ta bisto tur dia mas y mas. Awe por encontra tanto problema social den comunidad y na mes momento ta haci falta di un maneho directo di parti di e gobierno actual. Gobierno actual repetidamente riba un manera infunda y iresponsabel a sa di impone medidanan financiero riba lomba di pueblo sin tuma na cuenta e efectonan regresivo pa cu esnan financieramente menos afortuna. Gobierno ta keda aumenta su entrada cu medida sin embargo e gastonan di e gobierno tambe ta keda aumenta for di tur porcion.
 
Gobierno durante e ultimo 7 aña a ricibi mas cu 700 miyon florin extra cu cualkier otro gobierno den historia di Aruba, tambe a fia mas cu mil miyon. A pesar di esaki, keto bai tin un nesecidad grandi pa mas entrada serca e gobierno, pero di otro banda pueblo ta harta di medida y ta puntra su mes ta kico a pasa cu tur e placa cu e gobierno a sa di ranca for di pueblo. E situacion pesimo den e ramo di educacion y un falta di maneho sincero, realistico y alcaso di e gobernantenan responsabel den educacion ta un desafio enorme pa cada mayor na Aruba pa por ofrece un educacion adecuado pa nan yiunan. Awe gobierno ta ofrece e comunidad un educacion mediocre a consecuencia di un sistema caminda tin falta di material di calidad y infrastructura corecto. Tambe gobierno a frusta gran cantidad di maestronan cu mester percura pa duna un educacion adecuado na nos muchanan.
 
E situacion di criminalidad, ladronicia y desorden hudicial a bira intolerabel na Aruba. Esaki ta resultado di un incapacidad total di gobierno pa crea un maneho riba e tereno di husticia cu ta specifico, realistico y alcansabel pa ehecuta. Storianan bunita of “sterke verhalen” di e gobernantenan actual sin base cu argumento infunda tambe no a yuda comunidad di Aruba cu nada bon. E derecho di estado democratico di Aruba por wordo garantisa solamente si tin un sistema hudicial funcionabel y caminda e nivel di progreso di e pais lo ta ancra den e grado di desaroyo di e sistema hudicial. Tuma nota di e tantisimo casonan di criminalidad hasta cu arma pisa cu a bira normal aki na Aruba. Tur dia tin un cantidad di accidente, un cantidad di ladronicia riba tur nivel den comunidad y den gobernacion.
 
Otro situacion cu ta bira dia pa dia e graf real pa e comunidad di Aruba ta e situacion di AZV. Aki por papia cu enfasis di un maneho caotico y intransigente cu falta profesionalismo y dedicacion real. Aki ta haci un falta enorme di capacidad pa soluciona realmente e problemanan den salubridad publico. Para grita cu tur hende ta corupto y di mala fe ta un muestra indiscutibel di un incapacidad di e propio gobernante pa crea e posibel solucionan den e ramo di salubridad publico. Locual ta necesario ta un gobierno cu realmente sa con pa soluciona problema cu ta biba den comunidad y cuminsa na maneha Aruba segun un plan total pa enfrenta y contraresta e problemanan local y mundial cu ta afectando e comunidad Arubano. Mester di un gobierno cu un team prepara y profesional cu por ehucuta un plan bon studia, balansa y argumenta. “Pueblo por ta sigura cu na momento cu AVP drenta gobierno nos lo ta prepara pa trece Aruba bek den tur normalidad pa por sigui progresa a base di un vision bon prepara, discuti y argumenta caminda hopi contribucion di tur gremio, sectornan y pueblo ta envolvi”, Mike de Meza a finaliza bisando.
 
 

top