Cambio den e ley di voto di Parlamento Europeo

		Premiere Hulandes dr. Jan Peter Balkenende; lider di oposicion na Aruba mr. Mike Eman; dr. Mito Croes

Cambio di e ley di voto relaciona cu otorgamento di e derecho di voto pa miembronan di Parlamento Europeo pa tur Hulandes cu ta biba na Antiyas y Aruba a wordo presenta na Tweede Kamer na Hulanda.

E proposicion di ley ta provee den amplia e derecho di voto pa miembronan di Parlamento Europeo pa Hulanesnan biba na Antiyas y Aruba. Esaki ta resultado di un veredicto di e Departamento di Derecho di Administracion di Raad van State, ta haci cu e diferencia cu actualmente ta wordo mantene ora di duna derecho di voto pa miembronan Parlamento Europeo entre Hulandesnan cu ta biba den exterior di un banda y di otro banda e Hulandesnan cu ta biba na Antiyas y Aruba, ta uno cu ta bai en contra cu e principionan di igualdad.

HISTORIA

		Benny Sevinger; Maxim Verhagen; Mike Eman; Mike De Meza

Ora cu na 1985 a introduci e derecho di voto pa Hulandesnan cu ta biba den exterior conscientemente a scohe pa no duna e Hulandesnan cu ta biba na Antiyas y Aruba e derecho di voto pa Tweede Kamer Hulandes ni tampoco pa Parlamento Europeo usando como argumento mas fuerte cu ya caba e personanan aki tin e derecho di voto pa un organo Parlamentario dentro di Reino, esta e Parlamentonan di Antiyas y Aruba. Otorga e grupo aki e derecho di voto lo ta mes inusual cu duna derecho di voto na Hulandesnan na Hulanda pa vota pa e Parlamentonan di Antiyas y Aruba, asina e Gabinete na 1985 a husga. E gobierno a propone cu e exclusion aki lo ta aplicabel pa tur e habitantenan di Antiyas y Aruba, dus tambe pa Hulandes cu ta procedente di Hulanda cu ta biba na Antiyas y Aruba.

		Mike Eman papiando cu studiantenan Arubiano na Hulanda.

Tweede Kamer di Hulanda no por a bai di acuerdo cu e punto di salida aki. Finalmente a acepta un amienda den cua e proposicion di ley a wordo cambia di tal forma cu e derecho di voto pa miembronan di Tweede Kamer a wordo duna na Hulandesnan cu ta biba na Antiyas y Aruba con tal nan a biba por lo menos dies aña na Hulanda of cu ta den servicio publico di Hulanda. E derecho di voto pa e eleccionnan Europeo ta basa directmente riba e formulacion di derecho di voto pa Tweede Kamer. Esaki tin como consecuencia cu Antiyano y Arubianonan cu no a biba por lo menos dies aña na Hulanda of cu no ta den servicio publico di Hulanda, tampoco por a vota pa Parlamento Europeo.

E MOTIBO DI CAMBIO

		Koninklijke Boodschap (click pa mas)

Na 2004 señores Eman y Sevinger (miembronan di Parlamento pa partido AVP), Hulandesnan biba na Aruba, a apela e rechaso di gemeente Den Haag pa laga nan wordo registra como votadornan pa e eleccionnan di Parlamento Europeo. E Departamento di Derecho di Administracion di Raad van State a haya cu e apelación di Eman y Sevinger tabata hustifica. Segun e Departamento no tin un hustificacion obhetivo pa e regla dicon Hulandesnan bibando den exterior si por vota pa Parlamento Europeo, mientras cu Hulandesnan bibando na Antiyas y Aruba tin e derecho aki solamente si nan a biba por lo menos dies aña na Hulanda.

		Memorie van Toelichting (click pa mas)

Preliminario na e veredicto e Departamento a haci Hof di Husticia di Comunidadnan Europeo preguntanan pre-hudicial. Hof den su contesta riba e preguntanan pre-hudicial a indica cu Antiyano y Arubianonan cu tin e nacionalidad Hulandes y por lo tanto ta cuidadanonan di Union Europeo, pa e motibo aki por recuri na e derechonan cu ta poni den e di dos parti di e Acuerdo di EG (Comunidad Europeo) cu a wordo duna na e cuidadanonan di Union Europeo. Hof a yega tambe na e conclusión cu e ley di voto Hulandes ta bai en contra di e principionan di igualdad comunitario, pasobra Hulandesnan cu ta biba p.e. na Venezuela si por vota pa Parlamento Europeo y Hulandesnan na Antiyas y Aruba no por. E principio di trato igual ta stroba e criteria cu a wordo scohi cu cuidadanonan den situacionnan similar, sin ningun hustificacion obhetivo ta wordo trata den un forma desigual. E opinion ey e Departamento a tuma over.

E Departamento ta haya cu un cambio di ley ta necesario pa kita e discrepancia cu tin y ta duna den su veredicto cu den liñanan grandi tin dos posibilidad pa kita e discriminacion aki: e contradiccion cu e principionan di igualdad por wordo aboli dor di awor ainda duna e cuidadanonan Hulandes di Antiyas y Aruba e derecho di voto, pero tin un variante posibel na unda e derecho di voto pa Parlamento Europeo lo ta solamente pa esnan cu ta biba na Hulanda. Gobierno Hulandes a scohe pa e opcion na unda e derecho di voto no ta wordo limita, pero ta wordo amplia y ta duna di e forma aki contenido na e deseo pa un participacion mas grandi den e desaroyonan di Union Europeo dentro di henter Reino, locual tabata e deseo y postura tambe di e politiconan Eman y Sevinger. Pa por a logra nan ambicion Eman y Sevinger a wordo asisti pa e profesional riba tereno constitucional Mito Croes, kende a procede como apoderado na Raad van State y Hof Europeo.

Wak e paginanan aki tambe: