Otmar Oduber, Parlamentario di fraccion di AVP

Otmar Oduber a yega Aruba den fin di siman bek for di su biahe pa Republica Dominicana caminda el a wordo invita dor Presidente Leonel Fernandez pa ta parti di e grupo selecto di observadornan internacional den eleccion presidencial cu a tuma lugar diabierna ultimo.

Comentando riba su biahe, Oduber a bisa cu teniendo na cuenta e lazonan exitente mirando cu na Aruba tin un colonia grandi di Dominicanonan cu pa hopi aña ta integra den nos comunidad, a haci di e experiencia aki uno unico. El a expresa cu tabata trata di un proceso sumamente bon hinca den otro cu hopi innovacionnan tecnologico den dje cu a hala atencion di un cantidad di observador internacional presente.

Fuera di e parti di eleccion, Otmar Oduber ta expresa cu tabata un biahe sumamente interesante pa motibo di e diferente contactonan cu el a sera den diferente reunion. Entre otro, segun e Parlamentario di AVP, el a conbersa largamente cu Lic. Miguel Mejia cu ta e secretario di Estado, man drechi di Presidente Leonel Fernandez. Lic. Mejia a duna full atencion na Aruba. Tambe el a reuni cu Sr. Adriano Alberto Herrera cu ta e Consul General di Republica Dominicana na Aruba. Durante e encuentro ey por a papia di e diferente lazonan cu por tin tanto riba aspecto humanitario y comercial.

Riba esaki Otmar a duna di conoce cu Republica Dominicana na e momentonan aki banda di e industria turistico cu ta creciendo enormemente, tambe tin un bon planificacion pa loke ta agricultura y cria caminda cu nan ta concentrando hopi mes riba dje. Pa Otmar esaki tin hopi importancia pa Aruba, specialmente mirando e costonan haltisimo rond mundo pa loke ta trata produccion di cuminda y teniendo Republica Dominicana 1 ora y mei leu for di Aruba. Pesey a papia pa mira con lo por yega na tipo di areglonan pa manera e plannan ta na e momentonan aki ayanan, pa despues di abastece henter Republica Dominicana, cuminsa cu exportacion di berdura, fruta, carni, etc. Esaki ta hopi interesante pa Pais Aruba den concepto di e miembro di AVP.

Igualmente Otmar Oduber a comenta cu Republica Dominicana na e momentonan aki ta concentrando fuertemente pa loke ta energia alternativa, den e produccion di caña for di cual ta produci etanol. Na e momentonan aki Republica Dominicana ta e di tres pais na mundo cu mayor produccion di caña y ta preparando nan mes pa bai den e direccion aki manera cu Brasil y Cuba lo ta haciendo.

Pa loke ta trata e eleccion mes, Oduber a comenta cu President Leonel Fernandez den prome buelta di eleccionnan a logra acapara casi 54% di e votonan, mustrando asina cu despues di 4 aña di gobernacion a haya un sosten. “Como politico bo no ta mete den politica interno di e pais, pero bo ta mira si, cifranan ta demostra esey, un progeso enorme na e pais ey. Mi ta kere cu nos como fraccion di AVP cu ta prepara pa futuro, ta bon pa observa e cosnan positivo aki y mira con nos lo por incorporanan den nos maneho den futuro y den nos vision pa loke ta trata economia di Pais Aruba”, Otmar Oduber a duna di conoce.

Finalizando, Otmar a duna di conoce cu e President mes y Licenciado Miguel Mejia a haci un invitacion personal un biaha mas pa e por ta presente den e toma di posesion na augustus proximo, caminda cu President Leonel Fernandez lo huramenta un biaha mas como Presidente pa e proximo 4 añanan.

Intencion ta cu lo haci algun trabou y lo busca algun cifra pa mira con lo por fortalece e lazonan riba aspecto comercial y cultural entre e dos paisnan aki.

Wak e pagina aki tambe: