JOHN V.D. BIEZEN, Miembro di AVP

Dia tras dia nos por mira mas y mas e pioridadnan di Gabinete Oduber 4 saliendo na lus di dia. Un Gabinete cu a laga su mes wordo conosi como un Gabinete cu a costo di sudor y lagrima di un pueblo a faborece y ta faboreciendo un grupo di privilegiodonan, amigonan y campanjadornan di partido MEP na un manera abusivo. Den 7 anja di tempo Gabinete Oduber pa medio di un cantidad di medidanan y deroche di placa a masacra finansas di hopi hogarnan aki na Aruba.

Realisando cu e dolor ta wordo sinti na tur parti di Aruba, Gabinete Oduber 4 ta paga cu placa di pueblo un programa di televisión, caminda ta trata di splica e comunidad di Aruba cu e problemanan cu ta reinando den hogarnan ta problemanan fictisio, cu pues no ta existi y cu ta producto di nos mente.

Esaki sigur ta un insulto pa cu e inteligencia di e comunida di Aruba, ya cu sigur e recibo di awa y corriente cu no por wordo paga, gastonan di yuinan cu no por wordo cubri, e criminalidad creciente, e huurnan cu no por wordo paga, e prijsnan halto a causa di e BBO, no ta fantasianan, sino realidadnan amargo.

Por medio di e programa di televisión, Conecta cu bo mes, cu ta ser subsidia door di Gabinete Oduber 4 cu placa di pueblo, ta trata na spica pa medio di psicólogo- y sociologo nan cu tur e problemanan existente ta a causa di e negativismo cu ta reina den e pueblo. E tristesa ta bira mas grandi na momento cu esnan cu ta responsabel pa e negligencia di e aumento di violencia y criminalidad, e empobrecimento di e diferente barionan di Aruba, e kibramento di e lasonan di amistad y union, ta indiferente na tur esakinan. Subsidio pa polis por combati criminalidad mas efectivo, a ser corta, na hospital ta trata di corta vet según e lenguage di gobierno, agresividad y odio ta ser sembra diariamente di parti di propio gobernantenan. (Tiramento di explosivo ariba manifestanten for di oficina di gobierno).

Lenguage ofensivo e instigador di gobernantenan cu no ta contribui na bienestar sino na detereoro di norma y balornan den un comunidad. Arogancia, abuso y humiliacion sigur tambe ta simptomanan di e actual gobernación. E gritonan pa ayudo ta bin for di tur skina mustrando e realidad doloroso cu hopi hogarnan ta confrontando. E realidadnan aki no ta e fantasia cu Gabinete Oduber ta pretende di presenta na pueblo na un manera sutil. Ta increíbel pa mira tanto indiferencia y negligencia di parti di gobernantenan pa cu un pueblo.

Partido AVP no ta presenta fantasianan sino solucionan concreto y realisabel pa e bienestar ni nos comunidad y ta dispuesto pa reconstrui loke Gabinete Oduber a destrui.