Fundacion Digna-Lacle Herrera ta organisa:

Presentacion Parlamentario Mike de Meza,

Minister di Economia Antiyas Elvis Tjin-a-Sjoe y Ing. Leon Hammers

Download Invitacion (pdf)

Fundacion Formacion Politico Digna Lacle-Herrera ta presenta un cyclus di lectura riba “Desaroyo di Energia, Alternativa y Solucion”. E desaroyonan mundial riba tereno di energia ta cambiando y nos mester premira cu Aruba mester di un plan integral y sostenibel pa garantisa cu energia ta keda pagabel y sin consecuencianan grave pa nos economia y nos ciudadania.

Prijs di crudo ta subi y lo sigui subi, mirando e desaroyonan cu tin den mundo. E demanda cu ta creciendo den paisnan manera China, India y guerranan den Medio Oriente ta influencia e prijsnan. Tambe ta conoci cu mundo ta yegando su “Oil peak production”, esaki ta nifica cu e demanda pa crudo ta surpasando e produccion mundial. Consecuentemente mundo mester bai mira otro tipo di combustibel y fuente pa genera energia. Den e ultimo 5 añanan e prijs di crudo a triplifica. Na Aruba tambe no s a sinti efecto di e subida aki. Naturalmente ta recomedabel pa tin un plan di energia alternativo pa alivia e peso riba e poblacion. Den e ultimo tempo pueblo a cuminsa nota cu prijs di awa y corriente a subi drasticamente. Hasta por nota cu debi na e aumento aki, cierto famianan ta confronta problemanan serio pa cu e pago di coriente of awa.

Pa e motibo aki Fundacion Formacion Politico Digna Lacle-Herrera kier duna su sosten na juda busca e solucionan. Fundacion Digna Lacle Herrera cu e initiativa aki ta aporta na intercambio di ideanan cu posibel solucionnan a largo plazo. Pa e promer lectura Fundacion Digna Lacle-Herrera a invita e presidente di e comision di energia di partido AVP, parlamentario Mike de Meza, cu a produci e rapport “Plan Energia” den cual a analysa e problematica y a presenta alternativa y solucion. Parlamentario de Meza ta un experto riba e tereno di energia y ta tambe vice-presidente di e comision di Parlamento riba companianan di utilidad.

E fundacion tin e honor tambe di anuncia e segundo orador pa e dia informativo aki esta, sr. Elvis Tjinasjoe, Minster di Economia di Antiyas. Sr. Tjinasjoe lo duna un presentacion riba iniciativanan cu ta worde tuma na Antiyas epa loque ta trata e energia. Minister Elvis Tjinasjoe alabes lo elabora riba e iniciativa grandi cu Boneiro a tuma pa un instalacion di un planta moderno di biento di molina cu lo produci 50% di e total di energia di Boneiro. Tambe lo duna un bista di e molinanan di biento na Seroe Cora y Playa Kanoa na Curaçao.

Ing. Leon Hammers ta un experto technico y riba tereno di energia alternativa. Ing. Hammers a desaroya diferente concepto pa utilisacion di energia alternativa, entre cual “deep water cooling” cu por worde utilisa dor di e hotelnan pa reemplasa e systema convencional di airco y reduci e consumo di electricidad y gasto enormemente.

Loque Aruba mester segun entre otro e “Plan Energia” ta utilisa un combinacion di diferente alternativa. Esaki por mira ta e trend internacional tambe. Entre otro energia solar, energia di biento, energia for di desperdicio (waste to heat conversion), energia for di awa hundo di lama (deep sea cooling) y otronan.

E cyclus di lectura di Fundacion Digna Lacle-Herrera lo enfoca riba tur e alternativanan aki y tambe uso di un fuel mas economico.

Fundacion Formacion Politico Digna Lacle Herrera kier a exende un invitacion cordial na henter e pueblo di Aruba na e promer lectura aki.