Preguntanan di e miembro di Parlamento, señor drs. Rendolf A. Lee na Minister di Husticia señor H.R. Croes, segun articulo III. 17 di nos Contitucion y segun articulo 59 di Reglamento di Orden di Staten di Aruba.

Minister ta conciente cu no ta acceptabel pa minister di Husticia of cualquier otro miembro di Gabinete duna ningun tipo di orden of instruccion na Cuerpo Policial of ministerio Publico den un caso concreto di persecusion penal?

Minister por informa Staten si minister of minister-president tabata tin contacto cu Ministerio publico na momento cu a dicidi cu no ta detene sr. mr. H.S. Croes?

Minister por informa Staten si tabata tin contacto y si e contacto aki tabata cu Fiscal Mayor sr. mr. Hans Mos of otro funcionario di Ministerio Publico y cua minister tabata tin contacto?

Minister por informa Staten si e contesta ta afirmativo y kico e contenido di e contacto aki tabata?

Minister por informa Staten dikon den e caso aki e investigashon a wordo tuma over pa e departamento di Landsrecherche mirando e hecho cu e sospechoso sr. mr. H.S. Croes no ta un persona cu ta cay bao di e categoria di personanan cu ta wordo stipula den articulo 3 di e Landsbesluit taken Landsrecherche?

Minister por informa Staten bao ken su autorisacion Landsrecherche a tuma e investigashon over y no lage manera proceduranan normal pa e departamento di trafico di Cuerpo Policial Aruba? Minister por informa Staten si Gobierno a eherce influencia riba e desicion aki?

Proceduranan normal ta ora un persona keda deteni pa interogashion of wordo inverzekering gesteld, e sospechoso o detenido ta keda encarcela na un di e wardanan di polis pendiente e investigashion cu exepcion ora ta trata di un persona cu ta sufriendo un enfermedad y mester asistencia of cuido medico, esaki lo wordo traslada pa KIA debi cu eynan tin un ziekenploeg. Minister por informa dikon e sospechoso sr. mr. H.S. Croes si a wordo priveligia door di a wordo traslada pa KIA y no a keda encarcela na un di e wardanan di Polis, manera cualquier otro cuidadano cu ta wordo sospecha di a comete un delito y pendiente e investigashon mester keda encarcela na un di e wardanan di polis?

Minister por informa Staten si Gobierno a eherce influencia riba e desicion aki?

Segun ta stipula den nos Wetboek van Strafvordering, ora un persona wordo senjala como sospechoso di a comete un delito, no tin distincion en lo absoluto a base di su personalidad, rasa, religion o color politico ta ken e ta! Minister por informa Staten kiko exactamente Procureur General, sr. mr. Hans Mos tabata kiermeen cu e sospechoso, sr. mr. H.S. Croes ta wordo cualifica como “een niet zomaar iemand”?

Minister por informa Staten si den e Wetboek van Strafvordering tin un articulo of clausula cu ta indica un otro procedura penal mester wordo aplica pa un sospechoso cu ta wordo cataloga como “een niet zomaar iemand” y kiko ta e defincion di “niet zomaar iemand” y den cual buki di ley o jurisprudentia e procedura special pa “een niet zomaar iemand” ta regla?

Mirando e hecho cu ya ta mas cu dos luna y mei cu e incidente a tuma lugar, minister por informa Staten con leeuw e investigashonnan di dicho incidente (hit and run) ta actualmente ?

Tin entendi cu un reconstructie of foto opname di e incidente cu a tuma lugar dia 16 di maart 2008 a wordo teni na unda cu e victima, sr. Maduro, no a wordo pidi pa ta presente pa duna su version. Tambe tin entendi cu sr. mr. H.S. Croes si tawata presente pa duna su version. Minister por informa Staten si esakinan ta cuadra cu berdad? Si e contesta ta afirmativo minister por informa Staten dikon e victima en cuestion, sr. Maduro cu ta esun cu a entrega keho di lo sucedido no a wordo invita pa cu e reconstructie of foto opname di lo sucedido?

Tin entendi cu e preguntanan cu e rechercheurnan di Landsrecherche a hasi na sr. Maduro, cu ta esun cu a entrega keho, tur a wordo compila pa abogado di e sospechoso sr. mr. H.S. Croes. Minister por informa Staten si esaki ta cuadra cu e berdad? Si esaki ta afirmativo anto minister no ta hanja cu esaki lo ta un peliger pa cu e rechtszekerheid di e victima y nos pueblo en question? Minster ta hanja cu aki a atacha e credibilidad di nos sistema hudicial na unda cu a trapa riba e imparcialidad di e investigashon ?

Mirando e hecho cu bo persona ta 24 ora pa dia y 7 dia pa siman fungiendo como minister di Husticia, ta hopi preocupante mes ora di scucha bo persona declara durante un reunion publico di karakter di urgencia jama pa partido MEP e siguiente expresionnan:”Si mi ruman su detencion wordo prolonga, anto cosnan grandi lo bay tuma lugar riba e pida baranca Aruba”! Minister por informa Staten kiko exactamente bo persona tabata kiermeen cu e expresionnan aki?

Tambe pueblo por a scucha sr. N.O. Oduber, minister president di pais Aruba jamando militancia di MEP pa asina contra aresta esnan cu ta hibando un lucha pa cu nan indexering algun simannan atras. Tambe a ser expressa door di su persona cu esnan di MEP nunca a wordo cuida door di Polis. Cu cada un esnan cu ta MEP ta un polis riba su mes. Cu MEP no mester di polis pa cuide. Como minister di Husticia cu mester percura pa tin ordo, seguridad y tranquilidad riba nos isla, bo por informa Staten si bo ta comparti e expresionnan aki hasi door di minister president?

Por a scucha minister president cuestiona miembronan di Cuerpo Policial durante e manifestacionnan pa cu indexering na momento cu trucknan y trekkernan di containers a blokia L.G. Smith Boulevard na altura di e turbo rotonde. Minister president a declara cu e no ta compronde dikon polis no ta hasi uso di nan arma reglamentario y cu ta pakiko nan tin e arma anto si nan no ta usele! Aki segun mi por compronde ta cu cueste loque cueste mester a laga kita dicho truck y trekkernan for di caminda y si no por logra esaki a base di ordo anto mester bay over na usa nan arma reglamentario pa logra esaki! Minister por informa Staten si minister ta comparti e expresionnan peligroso aki hasi door di minister president ? Minister ta hanja cu dicho expresionnan hasi door di minister president di pais Aruba ta un insulto y un peliger pa cu nos estado di derecho, na unda cu Gobierno ta esun promer jama pa cuida nos seguridad y ordo en general?

Dia 11 di april 2008 nos por a tuma nota di presencia di Fiscal Mayor, sr. mr. Hans Mos den sala di parlamento. Tambe tabata presente alto comisario sr. de Witte y demas miembronan di nos Cuerpo Policial. Tambe sigur por a wordo constata cu ningun acto penal (strafbare feit) a wordo of keda cometi den sala di parlamento door di e manifestantenan promer of na momento cu sr. mr. Hans Mos tabata presente. Minister por informa Staten e motibo di e presencia di sr. mr. Hans Mos den sala di parlamento ariba dicho fecha? Minister por informa Staten si presencia di sr. mr. Mos den sala di parlamento ta un indicashon cu no tin suficiente confiansa cu e miembronan di nos Cuerpo Policial lo no hasi nan trabao debidamente pa desaloha sala di parlamento, debi na e hecho cu miembronan di Cuerpo Policial tambe tabata forma parti di esnan cu tabata manifestando contra Gobierno pa cu nan derecho riba indexering? Minister por informa si dicho presencia di sr. mr. Mos tawata riba su propio iniciativa of Gobierno ta esun cu a duna instruccion pa cu esaki?

Minister por informa Staten si ta berdad cu durante presencia di Fiscal Mayor, sr. mr. Hans Mos, e portanan di sala di parlamento a wordo poni na “lock” pa algun momento pa asina eventualmente stroba esnan cu tawata den sala di parlamento bandona e sala na e momentonan ey?

Tin entendi cu recientemente a sali un carta compila pa un funcionario di Ministerio Publico (sr. Jorg) dirigi na Gobierno di Reino ariba cierto irregularidadnan cu ta sosodiendo den Gobernacion y Ministerio Publico cu consequentemente ta un peliger pa cu nos rechtszekerheid y nos estado di derecho y na unda cu bo persona como minister a reacciona negativamente! Minister por informa Staten si enberdad dicho carta realmente ta existi y si esaki realmente a wordo dirigi na Gobierno di Reino? Si e contesta ta afirmativo minister por suministra kopia di dicho carta na Parlamento (miembronan di parlamento)? Minister por informa, si e contesta ta afirmativo di existencia di dicho carta, cual ta e reaccion di Gobierno di Reino di Hulanda al respecto?