Fundacion Estudionan Social Cristian Aruba

Parlamentario di AVP Benny Sevinger a declara cu e no por constata nada otro cu minister Booshi Wever su interesnan den Bouldin & Lawson ta mas grandi cu esun di pueblo.

Si mira con minister Booshi Wever a maniobra pa Boulin & Lawson hanja e projecto di Dump cu lo costa pueblo di Aruba den dos fase 56 miyon florin mas 80 miyon di mantencion den 10 anja. Ta lanta e pregunta di kiko ta e interes cu minister ta sirbi riba e interes di pueblo. Duna un compania un contract riba un projecto di e magnitud aki sin cu e compania aki por prueba cu loque e a bende Aruba ta un producto cu ta funciona y cu lo ta soluciona pa e problematio di suschi pa cual e projecto aki tin di sirbi, ta lanta hopi pregunta. Bouldin & Lawson no tin ningun caminda na mundo un projecto cu por mustra con e machinnan cu gobierno di Aruba a cumpra ta funciona, no tin ningun certificado di un organisacion reconosi mundial cu e proceso aki ta un “proven technology”. Alcontrario na momento cu minister Booshi Wever a firma e contreacto cu Bouldin & Lawson no tabata tin ningun plannan di kiko e projecto ta consisti.

Awor e pregunta ta kiko ta e beneficio cu minister por tin pa previlegia e compania aki Bouldin & Lawson. Un pregunta cu lo wordo contesta na e momento cu bini un investigacion pa cu e projecto aki. Un cos ta sigur cu e compania aki ta wordo representa pa oficina di abogado Hendrik Croes cu ta un di e donjonan di MEP, por ta e interes di mas grandi pa hanja e projecto aki, alfin y alcabo pa partido MEP ta friends and Family ta bin na prome lugar.

Awe e projecto aki ta mas di un anja y mei laat y nada ta pasa. Alcontrario awe minister Booshi Wever a busca pa tira culpa riba Icon pa salba Bouldin & Lawson. Si mira cu minister Booshi Wever no a firma ningun contract cu Icon pa e projecto aki sino cu Bouldin & Lawson e posicion di minister ta uno cuestionabel. Si un persona duna un contratista un contract pa traha su cas y e contratista no cumpli e contratista no por bin bisa cu ta culpa di e sub-contracter, mas ainda e donjo lo mester conteste cu no ta su problema, contract a wordo firma cu e contractista y e ta responsabel sin excusa.

Aki nos ta mira lo contrario minister ta bai sinta banda di Bouldin & Lawson cu ta esun cu e a firma contract cu ne y declara cu Icon ta esun culpable si cu e como representante di gobierno y pueblo ta bisa Bouldin & Lawson cu contract ta firma cu ne no cu Icons y cu Bouldin & Lawson ta responsabel y e boete clausule mester drenta na vigor. Rarara kiko ta e interesnan cu minister ta pone den balansa pa no hasi esaki, alcontrario ta duna Bouldin & Lawson un anja mas pa por caba e projecto.

Parlamentario di AVP Benny Sevinger a declara cu tardi of tempran e berdad lo Sali dilanti.