Marlon Sneek den nomber di Plataforma di Enseñansa

No ta un secreto cu enseñansa na Aruba ta den un “free wheel.” Nada pero nada no a sosode ariba tereno di enseñansa. Mientras cu e situacion aki ta prevalece nos por mira minister na televicion papiando di caminda y “riolering”, ki tristo esaki ta. E conclucion cu nos por saca ta cu simplemente minister Marisol Lopez Tromp no tin enseñansa na pecho! Nos por conclui cu e minister aki no sa nada pero nada di enseñansa. O talbes ta dor cu mayoria di e plannan di inovacion cu tin a wordo inicia pa partido A.V.P, e ta laga nan benta den lachi y no ta ehecutanan y ta laga e diferente gruponan di trabounan aki muri?

E parti mas tristo di esaki ta cu no ta nos so ta bisa esaki, pero den veld mes tin e mesun pensamento. Tin hopi demotivacion i frustracion bou di e docentenan. I hasta ariba nivel de reino tambe tin e mesun pensamento aki. Nos por corda ainda con N.R.C blad dia 24 di oktober 2007 a saca un articulo cu e titulo “EERSTE WERELD LAND, DERDE WERELD ONDERWIJS”, caminda nan ta pone un tras di otro e cosnan cu ta bayendo malo den nos enseñansa y cu ta nos pober muchanan ta esnan cu ta sufriendo bou di e situacion aki.

KICO A PASA CU ENSEÑANSA DI 2001 TE CU 2008...

“EPB”: despues cu a introduci E.P.B a pone un “projectbureau” pa guia henter e proceso aki. Kico a pasa cu e “bureau” aki? Minister Marisol a laga esaki muri. Marisol no a pone nada na lugar di e “bureau” aki pa keda encarga cu e guia, inovacion, investigacion ariba nivel di mercado laboral, no a percura pa resolve problemanan cu “aansluiting”. Problemanan existente ta entre otro e cantidad grandi di alumno cu un nivel masha abou cu ta drenta, e posibilidadnan limita pa cantidad grandi di alumno. Problemanan di maneho cu ta concerni e minister directamente. ”. E EPB di awo ta un barco sin direccion (¿).

E.P.I berdad tin un bunita edificio, pero e parti di educacion mes tin un cantidad di problema serio, entre otro Leiding (management), programanan di estudio, calidad y nivel, control y ‘toezicht’ examenan, edad creciente di docentenan. Tur asuntonan di maneho cu ta concerni e minister directamente.

“Kleuter y Basisonderijs”: ora cu PRIEPEB a haci diferente trabounan y tabata basta leu pa implementa esakinan, e lider e tempo ey a bandona e liderasgo di e proyecto. Minister no a percura pa un otro hende tuma esaki y sigui cu e trabounan. A prefera di laga esaki desangra y muri! Problemanan existente ta entre otro e cantidad grandi di alumno cu ta caba cu un nivel mucho abou y cu ta ‘perde’ den enseñansa secundario. E falta di un curiculo basico comun cu ta sigura cu e muchanan por sigui un estudio den enseñansa secundario, e cantidad di muchanan cu no ta bai scol cu regularidad pa cua motibo cu ta, e motivación abou di mucho hopi alumno, e falta di material, etc, etc. Tur asuntonan di maneho cu ta concerni e minister directamente.

“AVO”: ya for di un principio corta caminda di inovacionnan pa loke ta trata Ciclo Basico y Ciclo Avansa. E plan basico tabata 4 lokalidad sin distincion di MAVO y HAVO, dus un entrada integral pa e nivelnan aki, materianan comun y mas guia pa alumnonan, metodonan nobo, otro horarionan di les, facilidadnan pa scolnan y maestronan, etc. Tur cos segun e principio: posibilidadnan egual pa tur mucha. Nada di esaki a worde realisa. Ciclo Basico y Avansa a bin pero cu masha poco ingrediente di e Plan Basico. SHA a wordo limita den su capacidad pa traha, e no a haya hende pa traha, a stop e docentenan cu tabata traha den SHA cu nan coleganan den cada materia, a stop e reunionnan cu docentenan pa soluciona problemanan cu nan ta topa ora duna les den e forma nobo, awor a baha e cantidad di oranan pa guia e innovación dor di docentenan den scolnan mes, e diplomanan di havo y vwo ainda no ta wordo reconoci na Hulanda caminda mayoria di nos studiantenan ta sigui studia, etc.

“Enseñansa superior”: esta Universidad di Aruba y I.P.A. Marisol no a trata na ningun momento so pa cuida e nivel y calidad di e institutonan aki. Nos ta bayendo ya pa casi 10 aña cu e institutonan aki no a ser evalua pa loke ta nivel y calidad externamente (visitatie, evaluatie, accreditatie, etc) . E doorlichting ta necessario pa garantisa nivel di tur estudio y proteha e sutdiante pa ora e caba su estudio e tin un diploma (‘bul’) di nivel completamente ‘gelijkwaardig’ na un diploma haya na un otro instituto den Reino.

“NATIONALE ONDERWIJSPLAN PLAN"...

Pa loke ta e presentacion di e famoso “Nationale Onderwijs Plan” nos di plataforma mester bisa cu e plan ey apart di ta un aña laat, ta simplemente e ta un lista di deseo y niun caminda bo por lesa kico of loke a wordo constata na problemanan den enseñansa. Mucho menos kico por ta e solucionnan pa cu e problemanan den enseñansa. Den un plan asina nos a spera di haña por ehempel cu nos mester di un curiculo pa scol basico. E no ta un plan caminda tin para kico ta e metanan di cada clas y cada materia, pa asina garantisa cu nos muchanan ora cu nan caba scol basico por pasa na scol avansa sin tur e problemanan cu nos ta tende awendia. Tambe nos a spera di lesa por ehempel, cu minister lo bay pone mas placa disponibel pa p.e. kleuter- en basisonderwijs, Colegio Arubano, beroepsonderwijs, hoger onderwijs, etc. E NOP no ta bisa cu e scolnan aki lo haña un “doorlichting”, “visitatie” pa garantisa nivel di tur estudio y proteha e studiante pa ora e caba e tin un diploma di nivel y reconoci minimo den reino. E NOP no ta un plan pa mehora enseñansa! Nos conclusion ta: nos enseñansa ta pa su cuenta, mientras cu e minister ta atende caminda y brugnan rond di nos isla! Esaki ta su prioridad!