Problematica di choller birando dia pa dia mas grandi

DEN TUR ASPECTO DI NOS SOCIEDAD

Otmar Oduber miembro di fraccion di AVP den Parlamento a expresa su preocupacion pa cu e problema di choller cu ta birando cada biaha mas grandi.

Oduber ta indica cu dia pa dia e problematica di choller ta bira mas grandi den comunidad, cu e ta birando un problema hopi serio no solamente pa nos mesun hendenan, pero tambe pa cu nos turismo. Mirando cu e turistanan cada biaha ta haya e molester di e chollernan, esaki ta duna un ventaha na nos ccompetidornan den e region.

Pero banda di esey, e problematica di choller, segun e parlamentario di AVP no ta un problema mas cu ta limita na nos centro di ciudad, e la expande y yega den tur distrito den tur bario di nos isla.

Mientras tanto, lamentablemente no ta mira cu gobierno ta haciendo practicamente nada y e siman aki Otmar Oduber a keda sorprendi di tende Minister Booshi Wever ta kico pueblo kier pa e haci, pasobra ta un psiquiatra tin, cu si kier bai atende cu e problema di choller mester bai nombra 200 hende den aparato di gobierno, entre otro.

Esaki Oduber ta considera ponencianan cu ta mustra e incapacidad cu tin serca e gobierno aki. Mas aleu Otmar ta bisa cu fraccion di AVP y e mes a pone como antorcha cu e kier cana cune pa yega mas pronto posibel na por lo menos suaviza y yega na un solucion structural pa cu e problema di choller. E problematica aki ya caba ta afecta nos drasticamente, y e lo tin un efecto sumamente negativo riba nos turismo si nos no atende cune. Pero di biaha ta bisa cu e ponencia di gobierno pa nombra hende pa atende cu e problematica e no ta kere cu ta e solucion. “Presupuesto di Pais Aruba ta riba mil miyon florin cu nos ta gasta na tur tipo di cos, anto mi ta kere cu nos por saca un porcentahe chikito di esaki y atende cu un problematica cu tin di haber cu turismo, un problematica cu tin di haber cu seguridad, un problematica cu tin di haber cu bida social di nos hendenan y cu educacion di nos hendenan akinan na Aruba”, Otmar Oduber a finaliza.