Simposio di Fundacion Estudionan Social Cristian Aruba

Recomendacionan di FESCA ta mustra con por remedia

e desaroyo economico di Aruba

Diahuebs anochi, den un sala yen na EPI, Fundacion Estudionan Social Cristian Aruba, FESCA, e insituto cientifico asocia na partido AVP, a tene un simposio presentando nan ultimo estudio titula “Desaroyo Economico di Aruba”. E raport aki, despues di mas di algun decada ta e prome estudio macro-economico di Aruba y ta parti di un serie di estudionan cu ta inclui tambe estudionan ariba infrastructura y calidad di biba. E tres topiconan di e serie aki, ta supose forma un unidad cu mester ta den balanse pa bienestar y prosperidad di Aruba. E anochi a cuminsa cu palabranan di e moderador, Sr. Edward Erasmus cu a hasi un intrduccion ariba e importancia di un instituto cientifico den politica y pa nos comunidad. E la splica e meta y ambicionan nobo di FESCA. Sr. Erasmus e duna un splicacion elocuente di e rol di ciencia den politica y con e dos diciplinanan aki mester coopera pa forma un vision basa ariba hechonan. Na final di su introduccion di e anochi aki, sr. Erasmus a introduci sr. Klaas Tuinstra, cu ta un consehero di “Het Wetenschappelijk Instituut voor het CDA (WI).”

Sr. Tuinstra ta un ex-miembro di Tweede Kamer y banda di ta consehero di WI, tambe ta consehero di Prome Minister Hulandes, Jan Peter Balkenende y Minister di Salubridad sr. Ab Klink. Tuinstra a splica e diferente forma di populismonan cu ta hasi uso incorecto di poder y a mustra cu e tipo di movimientonan aki ta biniendo bek na “moda”. Consecuencia di e tipo di movimientonan di e tipo aki ta mal uso di poder y recursonan di nan pueblo. Pero, segun sr. Tuinstra, e tipo di mal manehonan aki ta basa mas ariba ignorancia cu esnan basa ariba hechonan. Sr. Tuinstra a sigui splica ariba e importancia di un instituto manera FESCA den e arena politico y su beneficionan. Institutonan cientifico manera FESCA y WI ta wordo forma pa investiga y colecta informacion pa asina politiconan por ta prepara pa efectonan cu no por a wordo premira sin un investigacion serio y profesional.

E di dos orador di e anochi tabata presidente di FESCA cu a hasi un resumen di tur loke a wordo hasi pa por prepara un estudio di e magnitud di “Desaroyo Economico di Aruba”. E estudio aki a enfoca ariba 4 aspecto esencial di nos economia: 1) Gastonan di turista, 2) Mercado Laboral, 3) Educasion Profesional y 4) desaroyo di salarionan. E tarea di FESCA ta pa bin cu recomendacionnan cu por duna un direccion positivo na e situacion cu Aruba ta aden pa algun tempo caba. E estudio ta basa ariba un periodo defini: 2000 pa 2007. Segun tur informacion cu por a wordo acomula, e cantidad di turistanan cu ta jegando Aruba a keda igual. Loke ta hasi e situacion precario pa nos pais ta cu loke e turista ta gasta na Aruba ta disminuyendo mas y mas. E cambernan di hotel no ta aportando na entrada di pais Aruba manera mester ta. Tin varios motibo pa esaki y segun sr. Arends e motibonan tras di e bahada di entrada tin di hasi cu factornan interno. A hisa salario minimo 2 biaha consecutivo y ariba dje a implementa un BBO. E consecuencianan tur hende por sinti pa basta tempo caba na Aruba. E nivel di prijs na Aruba a wordo hisa masha hopi mes.

Na final di un discurso masha intresante mes, sr. Arends a resumi e estudio cu e siguiente recomendacionan. E prome ta cu FESCA ta boga pa un ola di calidad den e 4 partinan di nos economia enbes di cantidad. Productividad mester ta e jabi cu mester percura pa crecemento economico. Inversion den educasion profesional, public-private partnership den educasion profesional y hasi nos educasion profesional mas den e direccion di loke ta rekeri for di e dunadornan di trabou. Pa finalisa e anochi, sr. Edwin Roos, presidente di Camara di Comercio tabata e orador invita. Den su discurso, sr. Roos a papia ariba topiconan manera capacidad laboral limita di Aruba, desaroyonan economico cu mester tene cuenta di nan, factornan cu actualmente ta den un desbalanse y maneho y desicionan cu Aruba mester pa mehora e situacion precario cu e ta aden. Esaki ta e base di loke Aruba mester saca mas probecho di dje. Sr. Roos a aplaudi e projecto di FESCA hunto cu WI, mirando cu hopi maneho ultimo tempo ta basa ariba suposicionan sin base alguno. Un ehempel di esaki ta e manera cu kier crea un cooperacion economico cu paisnan manera China. E tipo di iniciativanan asina no ta basa ariba hechonan, si no ta djis algo cu ta zona bon. Y e ultimo aki no ta agrega nada na nos economia. Sr. Roos a mustra cu e lo tuma debido atencion na e estudio di FESCA. Sr. Roos a caba gradiciendo FESCA pa e invitacion y a asegura cu KvK lo sa di apoya iniciativanan manera esun di FESCA. E topico di e anochi intresante aki, Desaroyo Economico di Aruba, a mustra di ta uno masha importante mes y cu merece mas enfoke. Sin duda algun, lo sigui mas informacion den prensa di e estudionan di FESCA.

Pa esnan cu kier lesa mas di e estudio “Desaroyo Economico di Aruba” di FESCA: klik aki...