|
E siman aki, Minister di transporte y Obranan Publico, Camiel Eurlings tabata na Aruba como parti di un viahe di trabou pa Antiyas y Aruba. Na tur isla e mandatario Hulandes a topa mandatarionan di e respetivo islanan. Na Aruba e tabata tin un encuentro adicional cu e partido ruman su partido. Partido AVP ta un partido Cristian Democrata, mescos cu CDA di Hulanda na cua Camiel Eurlings forma parti di dje. E encuentro di e minister tabata cu un delegacion di AVP combina cu uno di FESCA. E delegacion di AVP tabata inclui e lider di partido Mike Eman, Benny Sevinger y Mike de Meza. Directiva di FESCA, consistiendo di Richard Arends, Monica Oplaat y Armando Villasmil tabata forma parti di e delegacion di FESCA. E ultimo aki a presenta e minister nan ultimo raport cu ta un estudio macro-economico di e desaroyo economico di Aruba.
E esfera di e encuentro tabata hopi bon y a wordo hopi papia di visionan di ambos banda. Camiel Eurlings, prome cu e tabata minister tabata un miembro di parlamento Europeo y consecuentemente ta reconose e importancia di e relacion di Hualanda cu Union Europeo y tambe di otro partnernan den Reino cu Union Europeo.
Sr. Eurlings di su banda ta conta cu ta presisamente den e contexto ey e la conose Mike Eman. Algun aņa atras, durante un bishita na Hulanda, nan a hasi conosi cu otro durante di eleccionan di Union Europeo. Segun e mandatario ta splica cu e tin masha admiracion y respet pa e trabou cu Mike Eman y partido AVP ta hasiendo den e contexto di Union Europeo. Specficamente e la papia di e caso Eman/Sevinger cu recientemente a conose un resultado positivo pa Mike Eman y Benny Sevinger. Consecuentemente, e Gobierno di cua Minister Camiel Eurlings ta forma parti di dje, a entrega e cambionan di ley nesesario pa hasi e votamento pa parlamento Europeo posibel pa Arubiano y Antiyanonan na Tweede Kamer. E ley aki ta wordo spera di lo wordo acorda sin algun problema. Y pa e ultimo aki, Sr. Eurlings ta masha positivo. |
