Carta di Lider di AVP, mr. Mike Eman pa Minister dr.Ronald Plasterk

Cambio den valor di euro ta bira mucho caro pa paga !

Lesa articulo di RNWO

Lider di AVP, mr. Mike Eman a dirigi un carta na Minister di Enseñansa di Hulanda, dr. Ronal Plasterk. Den e carta e lider di AVP, mr. Mike Eman na nomber di fraccion di Partido di Pueblo Arubano AVP den Parlamento di Aruba ta pidi e Minister atención pa e problemática di e studiantenan di Aruba pa paga bek e debenan cu studiantenan ta cumula serca IBG pa nan fianza pa estudio.

Mr. Mike Eman ta splica e Minister cu, como consecuencia di e diferencia den cambio di euro cu a subi drasticamente den e ultimo añanan den comparación cu e florin di Aruba, studiantenan di Aruba ta regresa nan pais despues di nan estudio cu debenan astronomico.

Eman ta informa e Minister cu tur aña atrobe, centenares di studiante Arubiano ta scoge pa sigui un estudio profesional riba nivel di Associate, Bachelor y Master na Hulanda. Pa financia e estudionan aki, e studiantenan, banda di un financiamento di Aruba, tambe tin un financiamento cu IBG Hulanda.

Locual e lider di AVP ta enfatisa serca Minister Plasterk ta cu e studiantenan ta haci e fiansa di IBG, na un cambio mucho mas abou cu esun cu nan ta mantene pa paga bek ora nan caba di studia.

“Compara cu e studiantenan di Hulanda y esnan di Aruba cu ta permanece na Hulanda despues di nan estudio, e studiantenan di Aruba ta paga relativamente hopi mas bek, debi na e salarionan mas abou na Aruba, compara cu Hulanda. Tambe debi na e incremento di e cambio di e euro durante nan añanan di estudio”.

Eman ta bisa Plasterk cu e debe di estudio aki, cu ta relativamente mas halto, no ta solamente un peso financiero grandi pa e studiante cu a cuminsa traha den un funcion nobo, sino cu e ta desanima e hoben profesional Arubano cu a caba di gradua, pa regresa Aruba.

Encurasha nos hobennan profesional pa regresa nan pais Aruba, ta exactamente loke fraccion di AVP kier stimula y ta boga pe. Pa realmente promove esaki, e debe di “studiefinanciering” manera nos conoce, lo mester wordo reduci na un forma mucho mas husto, di forma cu e lo por ta igual na esun di e studiante Hulandes, Eman ta pleita pe, den su carta na Plasterk. Pa e motibo aki, e fraccion di AVP ta pidi pa tuma den consideracion pa mantene un cambio fiho favorable pa e grupo di studiante Arubano, pa loke ta trata e pago di nan debe.

Mr. Mike Eman ta mustra e Minister cu dentro di corto lo sali atrobe rumbo pa Hulanda, manera ya ta e caso pa hopi aña, un grupo grandi di casi 300 studiante Arubiano pa sigui nan estudio na tera friu. Nos lo desea di boga pa aplica e “reglamentacion di pago bou un cambio fiho” manera propone pa e grupo aki. Tambe Eman ta puntra pa haci un reglamentacion nobo valido tambe pa e studiantenan cu ya a regresa Aruba caba.

Locual e lider di AVP, mr. Mike Eman a constata cu tin centenares di hoben cu a regresa Aruba cu un debe grandi riba nan cabez y cu ta dificil pa cumpli cu esaki y cuminsa inverti den nan propio hogar y vida. “Ta asina cu nan ta sinti e efecto desbentahoso di e cambio enorme cu ta existi entre e euro y e florin Arubano”.

Eman ta spera cu Minister Plasterk lo tuma e peticion aki na concideracion y cu na Aruba tambe yega na un forma con por asisti e hobennan cu a regresa caba cu e peso di e fianza cu nan tin riba nan cabez. Banda di e carta aki pa envolvi Hulanda den un solucion, mr. Mike Eman, ta bisa cu lo haci e situacion aki tambe topico di discusion den Parlamento di Aruba y den Tweede Kamer durante e Tripartiet parlamentario na Hulanda. Den dialogo cu studiantenan na Hulanda e lider di AVP ta bisa cu e tema aki y otronan cu nos ta atendiendo tambe ta topico cu nan ta pidi atencion pe. Un di nan ta tambe e derecho di voto den eleccion na Aruba. “Esey tambe nos a tuma iniciativa pe. E ta un topico cu mester di un base amplio, pasobra constitucion mester worde cambia. AVP a haci proposicionnan concreto pa cu esaki den Parlamento.

E lider di AVP, mr. Mike Eman ta spera di por haya un reaccion positivo di Minister Plasterk riba e peticion pa suavisa e debe cu studiantenan di Aruba ta crea y tin cu IBG.