Parlamentario Mike de Meza

Hasta companianan estatal di utilidad ta confirma

cu gobierno ta drumi keto bai

Ultimo siman a scucha vocero di WEB Aruba NV splica cu e companianan di utilidad ta wardando riba gobierno, specificamente Prome Ministro Nel Oduber, pa tuma e decision den cual direccion mester bai cu alternativanan pa cu produccion di awa y electicidad. “Esaki ta otro prueba, manera nos di AVP ta bin ta mustra, cu enberdad e gobierno actual bou liderazgo di sr. Nel Oduber ta completamente na soño riba un topico asina importante”, Parlamentario di AVP, Mike de Meza ta indica.

E ta indica cu ta lastima cu net awor cu nos mester di gobernantenan diligente nos ta nota cu e gobernantenan actual enberdad no tin e capacidad pa prepara nos comunidad pa enfrenta situacionnan precario di embergadura grandi. E recibo energetico total di nos economia y nivel di bida na Aruba a surpasa e costo di aña 2002 cu mas di 200%. Aña 2008 ta pronostica cu lo surpasa 300% e recibo energetico di aña 2002.

“Ya for di añanan nos ta alertando gobierno di MEP pa asumi nan responsabilidad y actua decisivo pa cu e problema di energia mundial. Ta lastima pa nota cu Gobierno actual ta manehando nos pais den un forma cu ta bai liña recta den un desaster. Manera colega y lider di nos partido, mr. Mike Eman, ta bisa: e gobierno actual ta creando un “perfect storm” cu lo causa Aruba hopi daño y lo ta desastroso pa cu nos economia”, de Meza ta duna di conoce.

E ta agrega cu Parlamento ta wardando ya caba 2 aña riba un raport cu gobierno hunto cu e companianan di utilidad lo a traha y cu Prome Minister, den luna di juni 2006, a priminti Parlamento di Aruba cu esaki lo a wordo entrega na Parlamento na luna di december 2006. Awe despues cu Parlamento no a ricibi nada, diripiente ta scucha Prome Minister anuncia cu lo bai converti WEB den un sistema cu ta produci energia via un proceso cu ta utilisa gas natural. Te cu awe ningun hende y sigur Parlamento no a ricibi un raport of un presentacion caminda ta argumenta di con y a base di cual costo of cual estudio e factibildad pa cu e escohencia aki ta wordo hustifica.

Mike de Meza ta comenta cu ta como si fuera cu Prome Minister Nel Oduber a lanta for di soño y awor si ta core busca alternativa pa costo di energia. “Nos lo pone Sr. Nel Oduber responabel (hoofdelijk aansprakelijk) si na dado momento WEB of gobierno firma cualkier contrato pa añanan largo, sin cu Promer Minister bin Parlamento pa busca aprobacion, y cu lo afecta Aruba negativamente. Aparentemente sin ningun argumento pa substancia su actonan sr. Nel Oduber ta pone tur webonan den e macuto di gas natural. Riba mercado internacional historicamente gas natural semper tabata mas caro cu e fuel oil #6 cu WEB ta usa. Kico ta e base cu Sr. Nel Oduber ta usa pa substancia su “decision” pa kier bai converti WEB riba gas? Unda e transparencia di gobernacion a keda of por wel ta cu esaki ta otro triki di Prome Minister net den porta di campaña pa usa como cabai di campaña y purba desvia di e incapacidad di e gobierno actual, Mike de Meza a finaliza bisando.