Peticion di Eman y Sevinger a wordo aproba!

Dentro di poco lo tuma lugar e tratamento y deliberacionnan den Tweede Kamer di Staten-Generaal na Hulanda en cuanto e cambionan di e Ley di Voto (Kieswet) relaciona cu otorgamento di derecho di voto pa e eleccion pa miembronan di Parlamento Europeo na tur Hulandes cu ta biba na Aruba y Antiyas Hulandes.

E cambio aki ta di gran importancia pa Aruba y Antiyas. Al fin y al cabo den e caso aki no solamente ta trata di e Hulandes cu ta biba na Aruba, pero tambe e ta regarda cada cuidadano cu tin nacionalidad Hulandes. Parlamento di Aruba unanimamente a vota pa e peticion di lider di fraccion di AVP Mike Eman y su colega Benny Sevinger pa nan dos como delegadonan special di Parlamento di Aruba participa na e debate den Tweede Kamer ora cu e cambio di ley aki worde trata den un reunion plenario di Tweede Kamer. Parlamento di Aruba a aproba e petición di Eman y Sevinger agregando si cu si otro miembronan di Parlamento di Aruba ta desea cu nan tambe mag di participa na e reunion aki.

E motibo pa e cambio di ley aki, manera ta para den e parti general di e Memorie van Toelichting, tabata e apelacion di Eman y Sevinger contra e nengamento di gemeente Den Haag pa registra nan como votadornan na e elecionnan di Parlamento Europeo. E departamento di derecho administrativo di Raad van State a declara e apelacion di Eman y Sevinger valido, despues cu prome cu e peticion aki preguntanan prehudicial a wordo haci na Hof di Husticia di Comunidad Europeo. Hof den su contesta riba e preguntanan prehudicial ta indica cu tur Arubiano y Antiyano cu tin e nacionalidad Hulandes y dus ta cuidadanonan di Union Europeo, pa e rason aki por haci un apelacion riba nan derechonan cu den e tratado di EG a wordo duna na cuidadanonan di Union Europeo. E iniciativa cu a wordo tuma na 2004 dor di Eman y Sevinger, manera tambe ta wordo menciona den e Mensahe Real na Tweede Kamer di Staten-Generaal, consecuentemente a conduci na e peticion pa e cambio di e Ley di Voto.

Pa e motibo aki y basa riba riba artikel 111.2 di e Staatsregeling di Aruba, artikel 17 di Statuut, mescos tambe e aclaracionnan riba e disposicionnan legal, Eman y Sevinger a pidi Presidente di Staten pa manda un petición oficial na Tweede Kamer di Staten-Generaal pa asina duna nan e oportunidad pa di e forma aki nan por participa na e deliberacionnan den un reunion plenario. Mientrastanto Parlamento di Aruba a aproba e peticion aki y awor ta wardando riba e reacion di Tweede Kamer riba e peticion aki na unda Parlamentarionan di Aruba ta haya e oportunidad pa participa como delegadonan special na e deliberacionnan den Tweede Kamer.

Wak e paginanan aki tambe: