Durante Tripartiete na Den Haag, Hulanda:

Minister Plasterk ta informa cu e ta trahando riba un reaccion!

Durante Tripartiete parlamentario na Hulanda e lider di AVP, mr. Mike Eman durante un reunion cu Minister dr. Plasterk cu e parlamentarionan di Hulanda, Antiyas y Aruba a presenta e punto riba cual AVP a scirbi un carta pa minister caminda ta pidi e Minister atención pa e problemática di e studiantenan di Aruba pa paga bek e debenan cu studiantenan ta cumula serca IBG pa nan fianza pa estudio.

Mr. Mike Eman a splica e Minister cu, como consecuencia di e diferencia den cambio di euro cu a subi drasticamente den e ultimo añanan den comparación cu e florin di Aruba, studiantenan di Aruba ta regresa nan pais despues di nan estudio cu debenan astronomico.

Minister Plasterk a informa mr. Mike Eman cu e a ricibi e carta y ta contemplando con pa atende cu e asunto aki. E prminti di lo bin bek cu un contesta pa cu e preocupacion aki. Lider di AVP, mr. Mike Eman tin e confiansa na e manera cu e Minister a aserca e topico cu Minister Plasterk ta compronde e problema y ta despuesto pa juda pensa riba un solucion.

Eman a informa e Minister den su carta cu tur aña atrobe, centenares di studiante Arubiano ta scoge pa sigui un estudio profesional riba nivel di Associate, Bachelor y Master na Hulanda. Pa financia e estudionan aki, e studiantenan, banda di un financiamento di Aruba, tambe tin un financiamento cu IBG Hulanda.

Locual e lider di AVP ta enfatisa serca Minister Plasterk ta cu e studiantenan ta haci e fiansa di IBG, na un cambio mucho mas abou cu esun cu nan ta mantene pa paga bek ora nan caba di studia.

“Compara cu e studiantenan di Hulanda y esnan di Aruba cu ta permanece na Hulanda despues di nan estudio, e studiantenan di Aruba ta paga relativamente hopi mas bek, debi na e salarionan mas abou na Aruba, compara cu Hulanda. Tambe debi na e incremento di e cambio di e euro durante nan añanan di estudio”.

Eman ta bisa Plasterk cu e debe di estudio aki, cu ta relativamente mas halto, no ta solamente un peso financiero grandi pa e studiante cu a cuminsa traha den un funcion nobo, sino cu e ta desanima e hoben profesional Arubano cu a caba di gradua, pa regresa Aruba.

Encurasha nos hobennan profesional pa regresa nan pais Aruba, ta exactamente loke fraccion di AVP kier stimula y ta boga pe. Pa realmente promove esaki, e debe di “studiefinanciering” manera nos conoce, lo mester wordo reduci na un forma mucho mas husto, di forma cu e lo por ta igual na esun di e studiante Hulandes, Eman ta pleita pe, den su carta na Plasterk. Esaki e haya oportunidad pa reinforza den e reunion cu Minister Plasterk tambe.

Fraccion di AVP a pidi pa tuma den consideracion pa mantene un cambio fiho favorable pa e grupo di studiante Arubano, pa loke ta trata e pago di nan debe.

Mr. Mike Eman ta mustra cu dentro di corto lo sali atrobe rumbo pa Hulanda, manera ya ta e caso pa hopi aña, un grupo grandi di casi 300 studiante Arubiano pa sigui nan estudio na tera friu. Nos lo desea di boga pa aplica e “reglamentacion di pago bou un cambio fiho” manera propone pa e grupo aki. Tambe Eman ta puntra pa haci un reglamentacion nobo valido tambe pa e studiantenan cu ya a regresa Aruba caba. Locual e lider di AVP, mr. Mike Eman a constata cu tin centenares di hoben cu a regresa Aruba cu un debe grandi riba nan cabez y cu ta dificil pa cumpli cu esaki y cuminsa inverti den nan propio hogar y vida. “Ta asina cu nan ta sinti e efecto desbentahoso di e cambio enorme cu ta existi entre e euro y e florin Arubano”.

Eman ta spera cu Minister Plasterk lo bin cu un contesta positivo y cu na Aruba tambe yega na un forma con por asisti e hobennan cu a regresa caba cu e peso di e fianza cu nan tin riba nan cabez.

Wak e paginanan aki tambe: