Den un foro organisa pa "Organisacion Cristian Democrata di America"

E presentacion tabata titula:

"International Crime and Small Countries"

Lesa Speech

Programa di Evento

Riba invitacion di Presidente di Colombia, Alvarez Uribe, e Organisacion di Partidonan Cristian Democrata di America, a tene un foro cu como tema “Inseguridad, Dolor Evitable”. Pa e ocasion aki a invita estadistanan Cristian Democratico prominente di varios pais pa den un serie di discusion di panel, trata e tema aki. E discurso di inauguracion tabata na encargo di Presidente Uribe. Ex presidente di Spanja no por tabata presente pero via di video a participa na apertura. Un otro estadista cu a duna un presentacion tabata ex-Presidente di Mexico, Vicente Fox.

Ex Ministro Presidente di Aruba, Mr. J.H.A. (Henny) Eman, tabata uno di e estadistanan cu a ricibi un invitacion pa tene un presentacion di e forma cu Aruba a atende cu Hulanda y Merca pa asina segura cooperacion den e combatimento di droga y labamento di placa, cu ta representa un peligro grandi pa paisnan.

Di e forma aki e labornan di e ex Ministro Presidente Henny Eman riba e tereno aki y e logronan cu su Gabinete a alcanza, a haya reconocimento, cu ta representativo pa Aruba.

Mr. Henny Eman, kende den e panel cu a discuti e construccion di solucionnan pa e problema, specificamente e papel di paisnan chikito den combatimento di crimen internacional, ora tur hende su bista tabata dirigi riba menaza di guera, den e epoca cu e tabata dirigi e Plan di Rescate social, financiero, economico di Aruba, a mira cu crimen internacional tabata forma un peligro mucho mas grandi pa mundo cu guera.

Cu su aceptacion di e invitacion, el a subscribi e balor grandi cu e ta duna na e trabaunan di lidernan actual di nacionnan, manera Presidente Uribe, kende a cambia e rumbo di Colombia na un forma completo. Bogota a bira e segundo ciudad mas sigur na Latino America tabata palabranan di Uribe. Tambe Uribe a cambia grandemente e desaroyo economico na Colombia.

E ex Ministro Presidente di Aruba, Mr. Henny Eman, a haya hopi acogida pa su discurso den cual el a duna un relato breve di nacimento di e pais autonomo den Reino, Aruba. El a splica con den un tempo corto Aruba a sa di bira un pais di bienestar social y economico, cu a trece cune tambe responsabilidadnan cu nunca anterior e pais tabata tin. Uno di nan tabata e e trafico internacional di droga, cu tabata causa inseguridad den pueblo.

Mr. Henny Eman, cu como estadista di nivel no a presenta ningun problema interno actual di e pais den su discurso pero a tene su mes na mustra riba logronan den e creacion di un Aruba Nobo, a mustra cu semper criminalidad ta abau na Aruba. Pesey mester a evita cu criminalidad importa por a causa daño na Aruba, cu hopi bez tabata worde menciona mundialmente pa loke ta trata traficacion di droga y labamento di placa.

Su Gabinete a yega na e conclusion cu Aruba mes no por a yega na e solucion necesario y mester a busca cooperacion internacional. E problema pa Aruba tabata worde forma door di bon waf y aeropuerto, e sistema bankero y e posicion geografico di Aruba, cu tabata hacie trampolin di droga di paisnan productor pa e paisnan consumido.

E Ex Ministro Presidente di Aruba, a mustra con dificil ta pa un Gobierno admiti cu e mester busca cooperacion di otro paisnan. E bienestar di pueblo tabata mas importante. Pesey a establece contacto cu Reino Hulandes den un tempo cu Hulanda tabata tin un maneho basta tolerante enfrente droga.

Falta di comprension di parti di Reino, a trece cune confrontacionnan fuerte. A splica cu tabata absurdo pa Hulanda tabata tin material di ehercito cu no tabata worde usa pa elimina of minimalisa e sufrimento y morto di tanto adicto na droga.

Durante e prome encuentro e Ministro Hulandes a mira e delegacion di Gabinete Eman cu wowo grandi, pero awe Aruba tin loke a exigi, cu ta Guardacota di Reino Hulandes. E presion cu a pone riba Hulanda a conduci na logro.

Despues a bay atende cu Merca, cu tabata mustra dede riba Aruba. Den e tempo e diferente departamentonan di Merca tabata traha los di otro. Mester a splica State Department cu Rusia comunista tabata un menaza, pero cu prioridad mester a worde duna na e resultadonan horibel di droga pa miyones di hende.

A logra splica Merca e papel cu aeropuerto tabata hunga den droga y asina a logra convence Merca pa trece Imigracion Mericano y Douane Mericano pa Aruba pa yuda combati crimennan relaciona cu droga. E resultado cu tabata pa combati droga, a aporta tambe na turismo pa Aruba. Despues Forward Operations Location a establece su mes pa controla rutanan aereo .

E punto cu ex Ministro Presidente Eman a trece dilanti tabata cu criminalidad internacional relaciona cu droga ta causa tristeza pa miyones di hende y ta un problema global cu ta exigi cooperacion y no mustra riba otro cu dede.

Inseguridad ta stroba un bon futuro y ta haci dolor, e estadista Arubano Mr. Henny Eman a trece dilanti. El a mustra riba tur e medidanan cu a base di un vision total a worde introduci na Arua, pa eleva e nivel di bida. Como Cristian Democraat, AVP sinceramente ta kere cu e bienestar di pueblo ta depende di e nivel di educacion, di asesibilidad di cuido medico pa tur hende, e bienestar material di pensionadonan.

Aruba awor ta confronta retonan nobo propio di e tempo aki, manera ex Ministro Presidente Eman a trece dilanti. Su confianza ta den e generacion nobo di e partido cu un tempo el a dirigi. El a mustra cu tur dolor no por worde kita, pero sigur por alivie.

E presentacion di e ex Ministro Presidente di Aruba, Mr. J.H.A. (Henny) Eman a haya un tremendo acogida ya cu logronan concreto a worde presenta. E a mustra mundo con na Aruba a confronta problemanan, a base di vision, capacidad y determinacion a actua pa awe por presenta mundo e solucionnan como ehempel pa tur pais.