Durante Tripartiete na Den Haag, Hulanda:

E minister di enseñanza di Aruba ta silencioso riba e tema aki

Durante e tripartiete Parlamentario Mike Eman banda di a discuti cu Minister Plasterk en cuanto e problema di debenan di estudio cresciente di nos studiantenan y fututo studiantenan, tambe Eman a pidi atencion di e minister aki pa e asunto di reconocimento di diplomanan di e sistema nobo di HAVO y VWO. Ya pa basta tempo caba e asunto aki ta un preocupacion pa e alumnonan y nan mayornan. Preguntanan y protestanan di mayornan consciente te ainda no a logra ningun resultado. E minister di enseñanza di Aruba ta silencioso riba e tema aki y e unico cu el a haci ta despues di e protesta, saca un comunicado chikito di prensa den cua e ta splica cu e ta trahando riba e caso aki. Segun e minister di Aruba ningun hende mester preocupa su mes en cuanto e calidad di e enseñansa nobo pa scolnan secundario. Pero e no por a produci ningun prueba cu tin un acuerdo formal en cuanto reconocimento di e diploma nobonan cu Hulanda. Den su cuestionamento e siman aki na minister Plasterk durante e tripartiete Mike Eman ta mustra riba e importancia di e asunto aki pa futuro studiantenan Arubiano cu mester por haya mas claridad riba e reconocimento di nan diplomanan.

Mike Eman: “Un claridad no solamente ta duna e alumnonan y nan mayornan trankilidad y seguridad, pero e ta tambe un estimulo importante pa e futuro studiantenan pa termina nan estudio. E ta duna nan e seguridad cu e estudio cu nan kier sigui na Hulanda por wordo cuminsa cu exito. Finalmente e ta duna e docentenan, henter enseñansa di Aruba y e comunidad Arubano e seguridad cu tur cos ta na ordo cu e sistema nobo di enseñansa. Y cu nos tur por ta orguyoso di Aruba”. Mayoria di esnan cu a haci nan estudionan superior y academico cu awe ta traha sea den gobierno of den sector priva, a studia na Hulanda.

COOPERACION DENTRO DI REINO

Eman ta splica cu antes e diplomanan di HAVO y VWO di Aruba automaticamente tabata wordo reconoci na Hulanda y e alumnonan no tabata ningun problema cu admision ni continuacion di nan estudio na scolnan superior of universidadnan Hulandes. Desde cu Hulanda a renoba su enseñansa y a introduci entre otro e profieldiploma, Aruba a keda atras. E diplomanan di antes si ta wordo reconoci ainda na Hulanda, pero e diplomanan nobo no mas. For di 1996 ta existi un protocol di cooperacion riba tereno di enseñansa entre paisnan den Reino. Den e protocol aki acuerdonan a wordo haci riba e forma con lo trata e admision di studiantenan Arubiano na scolnan superior y universidadnan, esta prome, durante y despues di a introduci e enseñansa nobo pa HAVO y VWO. Cada pais den Reino lo a regla e enseñansa na su propio necesidad, pero na mes momento lo a boga pa reconocimento mutuo di e diplomanan. Tambe a wordo acorda e tempo ey e forma con e diplomanan Arubano lo a wordo reconoci. Lamentablemente lider di partido AVP Mike Eman ta constata cu e implementacion di e protocol den e ultimo añanan aki a wordo neglisha. E gobierno di Aruba mester indica con el cumpli cu e acuerdonan en cuanto e reconocimento di e diplomananan ya menciona. Si esaki mientrastanto por a sosode no ta conoci. Hustamente awor ta importante pa Arub caba cu e proceso aki.

Minister Plasterk di Hulanda a duna Mike Eman den su contesta di conoce cu Hulanda lo duna e asunto aki su debido atencion. Mike Eman: “Nos ta satisfecho cu Minister Plasterk lo pone atencion na e problematica aki. E manera con el a aserca mi cuestionamento y preocupacion ta duna nos speransa, pero no ta na e minister Hulandes so e asunto aki ta sinta. Tin tambe un responsabilidad grandi cerca e gobierno di Aruba pa haci lihe cu e asunto aki. Otro aña e prome studiantenan Arubano ta caba nan HAVO cu e profieldiploma. Su aña siguiente esnan di VWO. E reconocimento mester ta regla prome cu e studiantenan haya nan diploma. Ta cinco pa diesdos y di e Minister di Arubano di Enseñansa, sra.Marisol Lopez-Tromp no ta tende nada. Esaki NO por”.