Cuatro aña pasa parlamentarionan Eman y Sevinger a cuminsa e caso

 contra un ley descriminatorio contra Arubianonan

Den cuadro di su estudionan cu a conduci na su dissertacion tocante e relacionnan den Reino y e relacionan cu Union Europeo dr. Mito Croes a jega na conclusion cu e ponencia di majoria di profesornan y gobernantenan Hulandes cu Arubianonan no tin e cuidadania Europeo y consequentemente nan no tin e derechonan di cuidadanonan Europeo manera por ehemplo e derecho di voto pa parlamento Europeo no ta correcto.

E punto di vista di majoria di profesornan y tambe di gobierno Hulandes tabata cu ta Hulanda so ta miembro di Union Europeo. Segun nan Aruba tin e status di LGO y pesey leynan y decisionnan di Union Europeo no ta afecta Aruba. Consequentemente e Arubianonan no tin e derechonan cu e cuidadanonan di Union Europeo tin entre cual pues e derecho di voto pa parlamento Europeo.

Dr. Mito Croes a realisa cu e unico manera pa mira ta ken tin rason tabata pa laga e Corte di Union Eurpeo dicidi. E posibilidad pa laga Corte Europeo dicidi a surgi den cuadro di eleccion pa e parlamento Europeo di 10 di juni 2004.

Señores Mike Eman y Benny Sevinger cu hunto cu cuadro di AVP, cu a studia e argumentonan di dr Mito Croes, a jega na e mes un conclusion cu Mito Croes y a dicidi na maart 2004 pa aplica na e autoridad competente (B&W di Den Haag) pa por eherce nan derecho di voto pa parlamento Europeo. Manera tabata di spera autoridadnan Hulandes a rechasa nan peticion.

E rechaso aki a duna nan e oportunidad di apelacion na Raad van State na Hulanda. E tratamento publico di e caso aki a tuma lugar na juli 2004. Durante tratamento di e caso aki dr. Mito Croes a fungi como abogado/experto. Señores Mike Eman y Benny Sevinger tambe a hiba palabra y a argumenta pakiko nan, pero tambe tur otro Arubiano di nacionalidad Hulandes, mester tin e derecho di voto pa Parlamento Europeo.

Manera cu Croes, Eman y Sevinger a spera Raad van State no a duna su veredicto, pero mirando tur e aspectonan fundamental pa Union Europeo a referi e caso pa Corte di Union Europeo na Luxemburg.

E Corte aki mirando cu e caso aki lo por tin un efecto grandi riba definicion di kende ta posee cuidadania Europeo, a dicidi cu e caso aki mester worde trata den Sala Plenario di Corte. E Sala Plenario aki ta consisti di 25 huez. Un di cada miembro di Union Europeo. Mirando e importancia grandi pa nan cuidadanonan fuera di Hulanda, tambe Comision Europeo mes, na nomber di henter Union Europeo, y e miembronan di Union Europeo Francia, Inglaterra y Spanja a dicidi pa interveni den e proceso dilanti di Corte Europeo. Nan tur a manda nan conclusion y conseho por escrito pa Corte.

Dia 5 di juli 2005 e caso a ser trata den un session publico di Corte den Sala Plenaria cu tur 25 huez presente. Den e sesion aki Hulanda y tur otro paisnan cu a manda nan comentario por escrito y tambe Comision Europeo mes a presenta cu un batayon di abogado pa argumenta nan ponencia dilanti di Corte. Di banda di Mike Eman y Benny Sevinger, ta Mito Croes so a participa como abogado y experto. Mito Croes a splica Corte y abogadonan di e paisnan cu a tuma parti den e proceso exactamente kiko ta e razonan huridico cu e decision di Hulanda, pa no laga Arubianonan manera Mike Eman y Benny Sevinger vota, ta discriminatorio y contra leynan fundamental di Union Europeo.

Despues a dura trobe te 19 di april 2006 cu Abogado General di Corte, esta Tizzano a duna su conclusionan na Corte. Corte mes a tuma su decision den un session publico di Sala Plenario dia 12 di september 2006. Corte a duna Mike Eman y Benny Sevinger razon bisando cu e ley actual Hulandes encuanto derecho di voto pa Parlamento Europeo ta discriminatorio y Hulanda ta obliga pa cambia e ley aki.

E decision di Corte Europeo a bai pa Raad van State, cu a tuma e decision aki over y asina Hulanda a keda sentencia pa cambia su ley encuanto derecho di voto pa Parlamento Europeo.

Cu hopi satisfaccion Mike Eman, Benny Sevinger y Mito Croes ta mira cu diahuebs awor e bataya legal cu a dura mas di 4 anja lo jega na su fin, ora cu Tweede Kamer lo mester bai di acuerdo pa cambia Kieswet Hulandes. E cambio aki lo tin como consecuencia cu cuidadanonan di Aruba lo por bai vota y pone nan mes candidato pa eleccion di otro anja di Parlamento Europeo.

Ta pa promer biaha cu gobierno y parlamento Hulandes ta hanja su mes obliga dor di Corte Europeo pa cambia un ley na fabor di cuidadanonan di Aruba. E decision di Corte Europeo den e caso di Eman/Sevinger contra Hulanda awor ta un ‘standaard arrest’ cu ta poni den tur boeki academico nobo tocante derecho di Union Europeo. Por mira con importante e sentencia den e caso aki ta si djies mira cu por ehemplo riba Google tin mas cu 2800 mencion di e caso Eman - Sevinger contra Hulanda y den tur idioma di e miembronan di Union Europeo.

Cu e caso aki a keda demonstra cu tambe den asuntonan huridico complica ta nos mes mester studia nos asuntonan y no bai simplemente tras di loke Hulandesnan ta bisa aunke cu nan por ta profesor of gobernante.

Mas articulo relaciona cu e topico aki: