Den sesion plenario riba ley di eleccion

CDA, PvdA, SP y SGP ta expresa sosten pa cambio di ley !

		Foto: Dirk Hol

E reunion riba tratamento di e ley pa duna ciudadanonan di Aruba y Antiyas derecho di voto a tuma lugar den un ambiente di hopi reconocimento pa e inicitaiva di e ciudadanonan y politico, mr. Mike Eman y Benny Sevinger. E reunion a inicia cu reconocimento di parti di e Presidente di Tweede Kamer, Gerdi Verbeet, pa presencia di e Arubianonan mr. Mike Eman, dr. mr. Mito Croes y mr. Adi Thijsen. E representantenan di Aruba a haya un lugar special den Tweede Kamer pa por a presencia e tratamento di e cambio di ley.

Di parti di e fraccion di PvdA, e miembro di Tweede Kamer Kalma a expresa cu nan fraccion ta para completamente tras di e cambio aki. E a mustre cu no ta corecto cu tabata existi e discrepancia aki. Fraccion di PvdA ta haya cu mester tin trata iqual den Reino Hulandes.

Schikelshoek di CDA a mustra un reconocimento grandi pa e trajecto di perserverancia di Eman y Sevinger cu a cristalisa den e cambio di ley aki. E a mustra cu e determinacion cu cual for di 2004 a incaminda e proceso pa yega na e derecho di voto ta un prestacion pa cual e kier a complimenta Eman y Sevinger. E a bisa tambe cu na su opinion e ley aki mester tabata un Rijkswet. Asina tambe lo por a duna oportunidad na e derecho di e delegacion di Aruba pa participa den e debate. Mirando cu toch e ley tin implicacionan pa Aruba y Antiyas a organisa un reunion publico di e commission cu tat rata e ley den cual mr. Mike Eman a duna un relato amplio di e vision tras di e esfuerso aki.

Griffith di VVD tambe tabata tin hopi elogio pa e iniciativa di dos ciudadano di Aruba cu a cristalisa den obtene e cambio di ley aki. VVD a haci pregunta riba aspectonan technico di e ley pa determina finalmente nan posicion, maske Griffith tabata hopi elocuente den su aprecio pa e esfuerso cu Eman y Sevinger a desplega. Van der Staaij di SGP di cu ta algo remarcabel cu den siglo 21 nos por experiencia un otro momento di logro di derecho di voto. E di cu siglo 19 y 20 tabata marca pa e momentonan aki cu a parce di a completa e proceso realisacion di derecho di voto universalmente. Sinembargo awe nos ta wak realisacion di cambio di un ley cu ta bai duna 200.000 persona derecho di voto. Esaki sin duda ta algo grandi y historico.

Sorprendente tabata e sosten di fraccion di SP pa e cambio di ley aki. Van Raak a bisa cu maske su partido no ta un gran apoyador di Union Europeo su partido ta para pa trato iqual y e respet pa derechonan fundamental. Den e cuadra aki su fraccion ta sostene completamente e cambio di ley aki. E mescos cu otro a puntra Staatssecretaris Bijleveld ariba e forma con ta bai ehecuta e derecho di voto.

E unico fraccion cu tabata retundamente contra ta PVV representa pa Brinkman. Na opinion di Brinkman Antiyas y Aruba tin cu bira independiente y nan tin nada di busca mas den Reino corda den Union Europeo. E tabata preocupa tambe cu cada voto lo por bai costa 16 euro na gasto pa Arubianonan y Antiyanonan por vota. E a puntra Bijleveld pa laga Aruba y Antiyas paga e gastonan aki.

Staatssecretaris Bijleveld a splica cu e cambio di ley tabata e forma mas adecuado cu gobierno di Hulanda a mira pa cumpli cu e posicion di Corte di Europ y di Raad van Staen den e caso cu e parlamentarionan Eman y Sevinger a gana. E a bias cu por a crea iqualdad dor di kita e derecho di voto di tur hulandes pafor di Hulanda. E di cu e no ta kere cu esey ta locual Hulanda of Eman y Sevinger lo tabata kier como resultado di e caso aki. Duna e derecho di voto na tur Hulandes tambe pafor di Hulanda ta e mihor forma pa ehecuta e principionan cu a worde subraya den e iniciativa di Eman y Sevinger, Bijleveld a bisa.

Mas articulo relaciona cu e topico aki: