Parlamentario di AVP Benny Sevinger:

Parlamentario di AVP Benny Sevinger ta contento cu e ley pa derecho di voto pa Parlamento Europeo a bira un realidad. E derecho mas sagrado cu un cuidadano por tin ta su drecho di por expresa kendenan por represente den parlamento. Den e caso aki nos mester ta conciente cu pasobra nos ta cuidadano di e comunidad europeo y pasobra leynan y tratadonan cu ta regarda entre otro nos nationalidad ta ser fiha entre otro den parlamento europeo nos mester por tin e posibilidad pa expresa nos voz atraves di nos derecho di por voto. Awor nos cuidadanonan tanto di Aruba como di Antiyanan Hulandes a haña e derecho aki cu e cambio di ley cu a ser pasa ajera den Tweede Kamer unda sr. Mike Eman, sr Mito Croes y sr Ady Thijsen hunto cu minister plenipotenciario di Antiyas sr.Comenencia tabata presente pa presencia e momento importante aki.

Pa Benny Sevinger e derecho aki ta mas cu un derecho di voto, e ta habri hopi posibilidad y portanan na Europa pa nos como cuidadanonan di e comunidad europeo. Sigur tempo cu Aruba a hasi e escohencia pa keda den di Reino Hulandes ta pasobra nos pueblo ta conciente di e siguridad y garantia cu Reino Hulandes ta significa pa nos. Cu e derecho di voto aki nos pueblonan lo ta participe den e escohencia pa e partidonan cu lo representanan den Parlamento Europeo. E derecho aki lo concientisa e partidonan cu ne momentonan aki ta tuma desicionan den Parlamento Europeo cu tin consecuencia pa nos cu awor nan tin di tene cuenta cu nos pa chikito cu nos porta. Nos tin e derecho di voto y nos voz lo conta y lo ser respeta. E derecho aki ta parti di e union y cohecion cu lo mester garantisa cu nos lo tin un Reino Hulandes caminda tur parti di reino lo bai padilanti. Un desaroyo unda e cuidadanonan di Reino Hulandes por mira y sinti e beneficionan pa ta forma parti di e Reino aki, y consecuentemente di e comunidad Europeo. Forma parti di Reino Hulandes y di Union Europeo lo garantisa stabilidad den nos estado di derecho unda lo duna e confiansa pa tin invercionnan cu a garantisa y lo sigui garantisa e desaroyo economico cu nos pais a conose te na e momento aki. Sin duda portanan nobo lo habri pa esnan cu lo bai hasi uso di e relacion aki pa desaroya y sobresali den e mundo globalisando.

Garantisa un mihor enseñansa, garantisa mihor sistemanan social, garantisa mihor proteccion pa nos medio ambiente, garantisa mihor infrastructura, garantisa mihor sistema di husticia, garantisa mihor gobierno ta e garantia cu nos lo merster fortifica y garantisa den Reino Hulandes y den Union Europeo. Un relacion cu al final lo garantisa un mihor bida pa nos cuidadanonan. Parlamentario di AVP Benny Sevinger a termina bisando cu no ta tur cos ta fasil y mester a lucha hopi pa haña e derecho di voto aki, awor nos mester ta conciente di dje y hasi uso di dje pa nos garantisa e futuro di Reino Hulandes di Union Europeo pero mas e felisidad y e futuro di e generacionnan cu ta bin nos tras.

Mas articulo relaciona cu e topico aki: