Segun Mike de Meza:

For di oposicion a logra un cambio historico na beneficio di

nos pueblo den pleno desaroyo di globalisacion

Mike de Meza, elaborando riba e hecho historico cu a tuma lugar diahuebs den sala di Tweede Kamer na Hulanda, caminda cu e ley a wordo aproba pa duna e Hulandesnan Caribense e derecho di voto pa Parlamento Europeo, a indica cu e ta sinti su mes hopi orguyoso di ta pertenece na e partido cu a logra e cambio den Reino Hulandes aki.

Siman pasa ya caba Mike Eman y Benny Sevinger a haci historia ora cu nan a participa activamente den e reunion di comision central na Hulanda caminda Mike Eman alabes e ‘Vote-Getter y e actual lider-maximo’ di Aruba a defende e ponencia di e ley den sala di parlamento na Hulanda cu ta wordo conoci como e ley ‘Eman-Sevinger’. Diahuebs e la bolbe haci historia caminda cu for di oposicion coleganan di Mike de Meza cu sosten di e gran experto riba tereno di derecho constitucional, dr. Mito Croes a logra pa Hulanda adapta su leynan electoral, algo cu nunca ningun hende lo a imagina, pa asina duna derecho di voto na e ciudadanonan di Aruba y Antiyas pa Parlamento Europeo. Atrobe Mike de Meza a enfatisa riba e hecho cu hopi Arubiano y Antiyano lo aprecia y lo ta orguyoso ora nos pueblonan realisa con un derecho fundamental mas a wordo conquista pa nos mesun yuinan di tera.

Cu esaki un biaha mas AVP ta haci historia den Reino Hulandes caminda ta busca e mihor beneficio pa nos hendenan, caminda cu awor nan por participa activamente den e votacion di esnan cu ta aproba leynan cu tin influencia directo riba nos isla, fuera cu ta habri un cantidad grandi di posibilidadnan pa nos isla riba tur aspecto. Ta solamente esnan cu mente chiquito y politicamente maligno ta purba di bagatalisa e victoria fundamental aki. Semper nos di AVP ta bisa: si bo kier mustra grandesa y vision, anto cada ken mester hasi esaki cu trabaonan grandi y cu hechonan tangibl. Hamas cualqier politico den historia a wordo reconosi como un lider real di un nacion abase di tiramento di lodo riba su contracantenan. Historia semper lo trece claridad y duna muestra na kendenan realmente a contribui na un adelante di un pais y su pueblo. Un tirado di lodo y mentira lo duna confirmacion di ta simplemente un “politico” fracasa y cu lo kier persigui tur su contracantenan! Nos mester laga nos hechonan di nos trabaonan ta nos marca di pasonan cu mester ilumina e futuro generacion pa por sigui engrandese e direction cu mester encamina.

Pa Mike de Meza, e logro di Eman, Sevinger y Croes ta un muestra grandi di e amor, pasion, vision y determinacion cu partido AVP tin pa cu desaroyo y bienestar di nos hendenan caminda semper ta busca e mihor caminda pa nos pueblo. Un promesa cu AVP semper a haci, ta haci y lo sigui haci, y mas importante ainda, cu ta wordo cumpli tambe, pasobra esey ta e drive di e partido, Mike de Meza a finaliza bisando.

Mas articulo relaciona cu e topico aki: