Marlon Sneek den nomber di Plataforma di Enseñansa

Ta un secreto publico cu despues di e resultadonan di e “Nationale Eind Toets” di aña escolar 2006 / 2007 nada no a wordo haci, di parti minister ,pa por a juda e diferente scolnan pa mehora nan resultado. Diferente cabesante y guia interno a wordo jama pa papia di e resultadonan . Lesa bon.. algun, no tur esnan cu a wordo jama, a haña tende den concreto con nan scol a score. E scolnan en cuestion lo mester a scohe kico nan lo ta desea cambia pa nan scol (lesamento, matematica of idioma) y nan den nan cuerpo di maestro nan mes mester a bay traha hunto un “verbeterplan”. Si, e famoso “verbeterplan” cu minister ta papia di dje, pa logra mihor resultadonan.

UN TARDANSA DI OTRO MUNDO...

Den e mundo globalisa, computarisa cu nos ta biba aden, ta tuma maximo di 2 dia pa saca resultadonan di cualkier “toets”. Ta kico a pasa cu e resultadonan di e “Nationale Eind Toets” atrobe no a sali ainda? Paso ja un luna a pasa y nada! Lo ta cu minister ta wardando pa e bay show cu e resultadonan aki? Pa bisa cu danki na su bon maneho e resultadonan ta mihor e aña aki? Mi ta spera cu prome cu scol sera nos lo por haña e resultadonan di e “Nationale Eind Toets”, pa asina scolnan por prepara bon pa ora scol habri y no warda te cu mei aña pasa manera aña pasa!

E RESULTADONAN DI “NATIONALE EIND TOETS” 2008…

Manera cu diferente maestro y maestra a confirma na nos, despues di a tuma nota di loke ta wordo evalua den e “toets” di e aña anterior, nan a bay over na prepara (= train!) e muchanan pa cu e forma con e preguntanan ta wordo haci y tambe nan a busca materialnan extra pa zorg pa nan trata e diferente partinan cu nan mester por domina pa por traha e “toets” bon. Cu otro palabra, e aña aki nos, di plataforma, ta sigur cu e resultadonan lo ta hopi mas mihor cu esnan di e aña anterior y mester bisa aserca cu esaki no ta paso minister a haci algo pa drecha e resultadonan. Esaki mas bien ta paso cada un di e maestro y maestranan a zorg pa traha mas duro y guia e muchanan pa por logra mas di e “toets” aki.

KICO E RESULTADONAN POSITIVO AKI TA BISA NOS?

Difinitivamente mester bin c’un “Basisschool Onderwijs Leerplan”. Esaki ta e unico forma cu nos por garantisa cu tur mucha sin distinccion di cual scol el a bay, sea na Noord of na San Nicolas, tin e mesun conocemento ariba e diferente “onderdeelnan” cu ta stipula den e “leerplan” aki. Si tur hende, den e caso aki scolnan y maestronan ta na altura kico ta e conocemento cu cada mucha mester tin na final di cada aña escolar, nos por jega na scolnan di igual nivel y nos por controla tambe con e niveal di nos muchanan ta na cada scol y si nos ta logrando metanan. Paso na e momentonan aki, minister kier logra metanan cu ensenansa sin stipula kico exactamente ta e metanan cu e kier logra. Y ela wordo adverti pa esaki di antemano!