Ing. Mike de Meza, parlamentario di fracion di AVP den Staten di Aruba

Pronosticonan ta cu esaki lo sigui aumenta!

Mike de Meza, Parlamentario di AVP y experto riba tereno di energia, tabata un di e oradornan durante e forum di energia orginza pa SIWA. Papiando riba e prijs di crudo e ta bisa cu ta spera cu esaki lo aumenta te 150 pa 200 dollar. Pa loke ta termino medio largo e ta bisa cu e prijsnan di crudo di zeta, pronosticonan ta cu esaki no lo baha na nivelnan cu tabatin algun aña atras, esta 20 dollar. Durante ultimo 10 aña prijs di crudo a aumenta cu 900%, ora cu e tabata entre 15 pa 22 dollar. Esaki tambe tin su efectonan pa tur e productonan deriva.

Diesel, gasolin y kerosin tambe a surpasa 250% di lo cual e tabata 7 aña pasa, y esaki sigur ta afecta cada un di nos. E trend ta cu e prijsnan aki lo sigui subi. Bayendo riba tereno di utilidad Mike de Meza ta indica cu e prijs di fuel oil tambe a surpasa 900% di lo cual e tabata 10 aña pasa. Esaki tin influencia directo riba costo di energia. Na 1998 1 kilowatt uur tabata costa alrededor di 23 cent y awe esaki ta costa riba 45 cent, esta un aumento di 200%.

Si wak esaki riba un aspecto mas grandi y tira un bista riba e costo energetico total na Aruba, por mira cu na 2002 nos tabata paga 203 miyon florin pa aña. 5 aña despues na 2007 nos tabata paga 435 miyon florin pa aña y awor e pronosticonan pa 2008 conservativamente tuma ta mustra cu nos lo ta riba 645 miyon. Esaki ta 3 biaha mas hopi cu loke e tabata na 2002. E situacion aki tin efectonan dramatico pa loke ta costo di bida na Aruba, como tambe riba e bida social cu nos a conoce pa basta aña. Mirando e fuel oil di WEB, na 2002 tabata paga alrededor di 68 miyon florin, awe nos ta paga 390 miyon, esta 573% di lo cual e tabata. Ya caba na 2007 esaki tabata 320% y riba esaki dentro di 1 aña e lo subi bai ora compare cu e base di 2002.

Continuando, Mike de Meza ta bisa cu si en berdad e inflacion cu nos a conoce na Aruba ta debi primordialmente na aumento di prijs di crudo, e ora nos lo tin un problema hopi grandi. Si di 2006 pa 2007 inflacion a subi di 2.5 pa 10.2%, e ora nos lo tin un problema hopi serio den e añanan cu ta bin, y ya caba esaki por wordo mira. Si mira e consecuencianan pa cu prijs halto persistente, esaki ta nifica un desaroyo hopi dramatico den prijs di cuminda y awa, pero tambe pa otro productonan. E ta nifica tambe cu e seguridad cu nos tabatin pa e bida social geopolitico ta cuminsa bira zwak. Aki Mike de Meza ta bisa cu e no ta dramatizando, cu esaki ta e realidad. Ultimo 10 pa 15 añanan tur e gueranan tabatin e base di razon di zeta.

Un otro tema cu Mike de Meza a elabora riba dje ta riba e oferta y demanda y con esaki ta afecta e prijs. Na e momentonan aki tin un aumento di populacion na mundo caminda cu na 1960 mundo tabatin 2.2 biyon hende, na 2008 esaki a subi pa 6.8 biyon, esta 310% mas cu na 1960. expectativanan pa 2030 ta cu esaki lo ta 9.4 biyon persona na mundo.

Mirando e aumento di poblacion dramatico na mundo, de Meza ta indica cu esaki ta nifica cu lo haci mas uso di e productonan cu nos tin necesidad di nan, caminda cu number uno ta zeta.

Di e 6.8 biyon hende cu tin na mundo, 1.5 biyon so tin acceso na energia manera nos conoce tur dia. Ultimo añanan China y India a cuminsa desaroya nan mes riba un nivel hopi halto y ainda nan no a yega na unda nos ta. Mirando cu China y India p.e. tin casi 50% di e poblacion total na mundo, hunto cu otro paisnan na Asia, Africa y Sur America cu tambe ta den proceso di desaroyo, Mike de Meza ta indica cu e demanda ta bira mucho y mucho mas grandi.

Pa ilustra esaki el a mustra con di 1965 pa 2008 e demanda pa zeta na Inglatera a subi cu 20%. Na Europa cu Euro-Asia esaki a subi cu 73%. Merca a subi esaki cu 80% y mundo total cu 168%, pero na China e demanda a subi cu nada menos cu 3328% (imaginabo!). Asina mes na China e consumo di zeta ta 2 bari pa capita, y ora mira esun di USA ta 24 bari pa capita y na Aruba esaki ta mas o menos 20 bari pa capita. Esaki ta espantoso ora ta tuma nota cu China, India y otronan, cu nan derecho, ta sigui desaroya nan pais.

Conlusion di loke Mike de Meza a trese dilanti ta cu e situacion no lo mehora y mas bien tin e tendencia cu e lo sigui empeora, caminda cu e demanda lo ta cada bes mas halto cu na su bes ta conduci na un prijs mas halto. Ta pa es motibo cu Mike de Meza ta bisa cu Aruba mester tin un sinti di urgencia masce cu nos sa cu e solucion ta un paketa di alternativanan, mester actua AWOR y riba un manera transparente den un PLATAFORMA NACIONAL!!

Mas articulo relaciona cu e topico aki: