IDC PREOCUPA CU SITUACION POLITICO NA VENEZUELA

Y ZIMBABWE

E Comite Ehecutivo di Internacional Democrata di Centro/Cristianan Demócrata Internacional (IDC), a reuni na Paris dia 27 di Juni. Na e reunion aki e Comité Ehecutivo di IDC a expresa su preocupacion pa e situacion politico na Cuba, Venezuela y Zimbabwe mediante tres resolucion.

E resolucion riba e situación di Venezuela a worde presenta pa e Presidente di IDC, ex President di Mexico, Vicente Fox y Vice-Presidente di IDC, Lider di AVP, Mike Eman. Después di reunionan na Den Haag e lider di AVP a acudi na e reunion di directiva di IDC den cual instituto e ta carga e posición di Vice Presidente.

E preocupacion pa cu Venezuela ta relaciona cu e proximo eleccionan local y regional cu lo tin dia 23 di November na Venezuela. Den un encuentro cu lidernan di partidonan di oposicion algun siman pasa na Colombia tanto Vicente Fox y Mike Eman a worde informa di un situacion preocupante den e proceso electoral na Venezuela pa cual e lidernan politico di Venezuela a solicita solidaridad di IDC.

Ta asina cu Contraloria General di Republica di Venezuela ta inhabilitando como candidato pa e eleccionan aki mas de 400 ciudadano venezolano. Nan ta worde nenga e posibilidad pa inscribi nan candidatura pa participa na e eventonan electoral pa Gobernador y Alcalde.

E inhabilitacionan aki por constitui un mecanismo inconstitucional y arbitrario cu ta traduci su mes den un desconocimento di e derechonan politico di e ciudadanonan cu ta worde inhabilita pa participa. Asina ta desconoce e derecho di e ciudadanonan venezolano pa elegi libremente su representantenan y ta duna gobierno ademas un instrumento pa mina principionan democratico fundamental.

Considerando cu den mayoria di e casonan di inhabilitacion aki ta sosode sin ningun juicio alguno y sin cu tin un sentencia definitivo firme emiti pa un tribunal di e República Bolivariana de Venezuela, e Comité Ehecutivo di IDC dia 27 di Juni a rechasa e tipo di practica aki den un resolucion. E resolucion presenta pa Vicente Fox y Mike Eman a apela riba Institucionan di Estado Venezolano pa respeta e reglanan constitucional y reestablece e derecho di e ciudadanonan pa elegi libremente su representantenan y e derecho di esnan inhabilita pa postula nan mes como candidato den eleccionnan popular. E resolucion ta convoca institucionan venezolano pa contribui pa genera un clima politico propicio pa e realisacion pacifico, transparente, democrotico y den igualdad pa e proximo eleccionan local y regional na Venezuela.

Durante e reunion di directiva aki di IDC a determina tambe cu e organisacion lo bai intensifica su apoyo den formacion politico di hobenan di partidonan miembro. Un cantidad di curso y seminario lo worde ofreci na un instituto nobo di Estudio cu ex Presidente di Mexico, Vicente Fox a habri recientemente, Centro Fox (www.centrofox.org.mx). Lider di AVP, Mike Eman a haya un invitacion personal di Vicente Fox y su esposa Martha Fox pa bin haci un bishita na e Centro nobo aki cu lo ta na disposicion tambe di partido AVP. Na e ocasión aki tambe Eman a elabora cu ex Premier di Belgica, Wilfred Martens riba e desaroyonan den Union Europeo. Wilfred Martens ta Presidente actualmente di e blok di parlamentarionan majoritario den Paralento di Europa cu ta traha bao di e nomber di Partidonan di Pueblo Europeo. Den e calidad aki e lo ta un consehero valioso den e proceso caminda ciudadanonan di Aruba tambe por vota awor pa Parlamento di Union Europeo. Riba e fotonan por mira e directiva di IDC den reunion na Paris cu atendencia di Eman y tambe e momento cu Mike Eman y Wilfred Martens ta intercambia di pensamento.

E Comite Ejecutivo di IDC a dicidi tambe cu e proximo Conseho di IDC lo tuma lugar na México na November 2008.

Mas Informacion: