MIKE EMAN TA HAYA UN PRESENTACION DI POLIS UTRECHT

Arubiano Oslin Trimon agente ehemplar den cuerpo di Utrecht

Riba invitacion di e Cuerpo di Polis pa region Utrecht e lider di fraccion di AVP, mr. Mike Eman a haci un bishita na e oficinanan di e cuerpo aki. Locual a resalta den e bishita aki ta e forma integral cu e cuerpo di Region Utrecht ta ehecuta su strategia pa seguridad y e hecho cu den e cuerpo aki tin un agente Arubiano ta traha, Oslin Trimon.

Mr. Mike Eman y su esposa Doina a worde yama bon bini dor di e Hoofd Inspecteur,Willem van Kollenburg den presencia di e miembro Arubiano den e cuerpo, Oslin Trimon. Inspector Kollenburg a informa e lider parlamentario di Aruba cu nan a prepara un presentacion completo pe ya cu nan ta pensa cu compartiendo pensamento riba strategia pa realisa mas seguridad semper e un por sinya di otro. Tambe nan a mira e bishita aki di Eman como uno special di reconocimento pa e agente ehemplar cu nan tin den cuerpo cu ta un Arubiano.

Presentacion di e plan “Veiligheidsplan 2008-2011” a worde haci dor di Edwin Luitjes. Enfasis di e plan ta pa aumenta e seguridad den e region y tambe e confiansa di e comunidad den e cuerpo. E asercamento ta uno integral y cu hopi atencion pa trabao di e polis den bario.

Un departamento cu e cuerpo ta hopi orguyoso di dje ta e “Afdeling Intake en Service”. Encargado den direccion di e departamento aki, Jacqueline Alleyne, a mustra cu e departamento aki ta alivia hopi trabao di papel for di e agentenan cu un operacion efectivo caminda e ciudadano por presenta tur nan preguntanan, preocupacion y haci kehonan formal. E personal di e departamento aki no ta agentenan policial, pero a haya un training special pa por maneha locual drenta na e afdeling service. E personal den Service tin e autoridad si di un “Buitengewoon Opsporings Ambtenaar”. Pues ora un hende bin warda pa entrega un keho (aangifte) nan ta autorisa pa tuma esaki. E afdeling Service ta kita hopi trabao for di e polis cu tin mas tempo e ora pa combati criminalidad riba caya. Tambe pa e departamento di recherche esaki ta nifica cu nan tin hopi mas tempo e ora pa dedica na soluciona otro casonan.

Tambe Eman a haya un presentacion di e Afdeling BON, (backoffice noodhulp) di groepchef, Theo Elzinga. Aki tur casonan chikito ta ser atendi (6 uur zaken). Ora un polis riba caya detene un persona, e ta traha su aanhoudingsverbaal y eventualmente su proces verbaal y pase over pa e afdeling BON. E ora e afdeling BON mes ta atende pa interogacion y contacto cu Ministerio Publico.

Pues aki atrobe e servicio ta dirigi pa e polis por bai bek mas liher posibel riba caya. Si ta un caso mas grandi e ta wordo pasa pa recherche. Tambe mr. Mike Eman a haya presentacion di e “Regionale Meldkamer”. Esaki ta un departamento cu ta traha cu un technologia sumamente sofistica di camaranan riba caya, supervision 24 ora di e monitornan cu bista riba locual ta pasando den e puntanan mas crucial den Utrecht y computernan cu ta gelink na otro cu aceso na polis, ambulance y brandweer tur hunto den un centro. Cada patruya y brommer ta ekipa cu un GPS. Pues na e momento cu e “meldkamer” manda un melding pa un patruya, mes ora e patruya ta haya esaki riba un pantaya (GPS) unda e mester ta. E patruya ta wordo guia via sattelite pa asina den un fraccion di tempo e ta unda e mester ta pa duna asistencia.

Mr. Mike Eman a haya tambe un splicacion extenso di e funcionario policial encarga, Coen Gorter, con e monitoring y surveillance riba caya ta worde gelink na otro cu technologia moderno y ta bira asina un instrumento sumamente efectivo den preveni y combati criminalidad.

Tambe mr. Mike Eman a comparti e ambiente di surveillance riba caya cu agentenan Trimon y Elzinga. Na final di e programa extenso aki di conoce e strategia di trabao di e cuerpo policial di Utrecht, mr. Mike Eman a haya un plakaat di Politie Utrecht y e “Veiligheidsplan” for di man di e agente Arubiano, Oslin Trimon.

Eman a keda impreciona cu e organisacion eficiente, technologia moderno y atencion pa servicio di e cuerpo di Utrecht. Pa mr. Mike Eman e hecho cu un Arubiano ta forma parti di un operacion asina importante na Hulanda ta motibo pa gran orguyo. Agente Oslin Trimon a sigui e estudio y preparacion pa bira wijkagent na Hulanda y awe ta forma un parti integral di e cuerpo aki. Mr. Mike Eman a splica e autoridadnan policial di Utrecht cu su interes ta debi na e hecho cu seguridad na Aruba ta birando tambe un reto creciente. “Nos mester por preveni y combati eficientemente pa haci Aruba mas sigur y unda nos por haya e voluntad di cooperacion y ta bon bini”, e lider di AVP, mr. Mike Eman a bisa cu aprecio pa e interes cu Cuerpo Policial Utrecht a mustre.