Marlon Sneek ta constata cu:

Ainda ta fresco den nos memoria, con temporada cu trahadornan publico tabata lucha pa nan indexering, un grupo basta grandi di studiante di Maria College a bay oficina di minister Marisol, “bestuurskantoor” y oficina di Gobernador pa hiba nan preocupacion pa cu nan scol cu ta completamente na werki. E tempo ey minister a bin cu jen di fanfaria, manera semper, y a bisa e muchanan pa no preocupa paso e siguiente dia mes e lo pasa na nan scol, pa tuma nota di e situacion y pa percura pa un solucion.

Kico a bin afo di esaki? Nada!! Minister a haci cos di desformal y no a presenta! Simplemente a manda algun trahador di D.O.W cu algun baricada y verf pa drecha aki aya. Nos por a tuma nota con e simannan tras di lomba muchanan di e mesun scol aki, esta Maria College, mester a sali ariba caya, “pidiendo limosna” pa por haña placa pa por drecha nan scol. Wel, na e muchanan aki y tur envolvi mi kier a bisa, pabien! Aruba ta orguyoso di boso, boso no a para man crusa warda minister haña su gana di cumpli cu su obligacion. Boso mes a sa di tuma e iniciativa pa boso scol.

Na e minister mi kier a bisa, Minister, minister ta un berguensa pa Aruba. Ministrer a laga minister su responsabilidad den man di otro. Minister kico ta mas importante cu enseñansa? Minister no ta kere cu na lugar di a traha e brug di Madushi cu a costa mas di Afl 600.000, minister por a inverti e placa aki den Maria College cual lo a costa alrededor di Afl 450.000. Wak e potretnan adhunto y saca bo mesun conclucion.

Minister cua di e projectonan aki ta mas importante pa minister?

Minister, kico minister kier pa e futuro di e pais aki? Minister te na unda minister kier degrada nos enseñansa? Minister otro aña escolar a jega na su fin. Minister a evalua si tabata tin desaroyo den nos enseñansa? Minister ki vision minister tin cu enseñansa? Minister, minister no ta kere cu Aruba y nos muchanan merese mihor?